2021-2025 kum kar Chin Ramkulh chung Pengkip i Sipin Committee thimnak cu atu Cozah thar a kai dih hnu ah tuah ding in timhlamhnak ngeih a si tiah Chin Ramkulh, Cozah lei chimphuannak nawlngeitu Sipin Minister Pu Soe Htet sin in thawng kan theih.
“Atu Sipin Committee an tuan caan hi January thla in cun an caan a dih cang lai. Committee thar thimnak tuah timi hi Cozah thar a kai hlan ahcun tuah awk a tha lo. Cozah thar a kai dih hnu tu ahhin kan tuah te lai. Cun, a nicaan zong chim khawh a si rih lo nain, a fiang mi cu March, April thla chung hrawng ahkhin cun a si te ko lai,” tiah Minister Pu Soe Htet nih The Hakha Post ah a chim.
Sipin Committee caan hi Hluttaw nih an tuan caan bantuk in kum nga a si ve i, upadi ning ah minung pakhat nih term hnih lawng an peh kho. Cun, Sipin Committee chung ahhin Khuanu Khuapa a si lo hmanh ah zatlang phu chung in minung pakhat tel khawh a si tiah upadi nih a langhter.
Hi kong he pehtlai in Minister Pu Soe Htet nih, “Sipin Committee ahhin minung 7 i tel khawh a si. Hi pasarih chung ah minung pahnih hi Committee Chairman le Secretary an si lai i, a dang minung panga hi committee chungtel an si lai tiah upadi ah aa tel. Cun, Khuanu Khuapa asi loah khuachung zatlang bu in minung pakhat committee chung ah aa tel kho timi zong hi thimmi chung in an si a hau mi a si,” tiah a chimchap.
Chin Ramkulh chung khuatekomh le sang khuabawi thimnak zong hi a ra lai ding February le March thla chung ah an tuah ve lai tiah theih a si.
Photo/ 2016 kum Hakha Sipin Committee thimnak an rak tuah lio i meekuang Minister le Cozah rian ngei hna nih an zoh lio
