Chin Ramkulh chung ah sianginn dihlak taangkua le taanghra siangakchia thar an cohlang hna lo, tiah tuanvo ngeitu sin in July 16 ah kan theih.
Sianginn ap mi cohlanlonak kong he pehtlai in Hakha Basic Education High School No. 1 sianginn lutlai S. Biak Cung nih, “Kan cohlang hna lo ti tik ah anmah le an khua cio ah siangsangrun a um ko ahcun kan cohlang hna lo. A ruang cu sianginn khaan kan i ting lai lo. Kan sianginn hi naitan li aa hninh lio ah sianginn pakhat tluk cacawnnak tha loin a rawk dih. A thar kan cohlan hna ahcun khaan tampi a hau lai. Sianglairun le Siangniamrun pawl sianginn luh a si ve ahcun a zeitihmanh in a thar cu chimlo, a thing hmanh an i ting lai lo. Cun, a thar kan cohlan hna ding mi cu pakhatnak ah a nulepa Cozah riantuan an si ca ah a thialkaam mi, pahnihnak ah a chungkhar ning in Hakha ah aa thial mi, pathumnak ah Hakha ah a um i Kawl lei ah sianginn a kai mi, COVID-19 zawtnak ruang ah a kal kho lo mi pawl kha kan cohlan hna lai. Taangkua ca ah khaan 18 kan timhlamh i taanghra ca ah khaan 24 kan timhlamh,” tiah The Hakha Post ah a chim.
“Kan sianginn ah hin siangsangrun cachimtu saya/mate minung 28 kan um. Cachimh tik ah sianglairun saya/mate he i bawmh kan hau. July 14 tiang ah sianginn in kan cohlan cang mi taangkua ah minung 262 le taanghra 259 an si cang. Hakha khuachung ah khua a sa mi an si ko zong ah BESH No.3 sianginn he aa naih mi cu No.3 sianginn ah an kai lai. Cun, anmah le an umnak sang he aa naihnak bik sianginn ah chiah an si lai,” tiah S. Biak Cung nih a chimchap.
Hakha BEHS No. 3, Sayagyi chang Chun Er nih, “Hi siangakchia thar cohlan lo hi khoika sianginn poh a si dih mi a si. A ruang bik cu sianginn khaan an i zawh lo ca ah a si bik. A ruang cu kanmah sianginn ah hin sianginn khaan dihlak hi khaan 30 leng hrawng a um. Nikum ah taangkua khaan 4 an si i khaan khat minung 20 lawng chiah an ngah ca ah khaan 14 ah chiah an hau. Nikum taang 8 khaan, khaan 4 an si ve i khaan 11 an chiah an hau. July 15 tiang ah sianginn kan cohlan cang mi minung taangkua kai ding 141 le taanghra kai ding minung 182 an si cang,” tiah The Hakha Post ah a chim.
Phihkhar caan hi July 31 tiang Cozah nih an thanh ko nain sianginn hong hlah u, tiah phungning in an thanh mi a um lo ca ah July 21 hon a si ko lai. STEAMS 4 kan then i STEAMS 1, 2 hi zarh khatnak ah an kai lai i STEAMS 3, 4 hi zarh hnihnak ah an kai ve lai. Siangakchia sianginn thlah tik ah naih tein thlah lo ding le sianginn thlah zong ah a ngandam mi nih thlah ding. Kum 60 cung le a ngandam lo mi hna nih thlah lo ding a si lai. A taklin mi siangakchia sianginn kai lo ding ti mi nawl an chuah mi hi nulepa hna zong nih kan zulhpiak hram uh, tiah BESH No.1 sianginn lutlai siseh BESH No. 3 lei nih siseh The Hakha Post ah an chim cio.
