Chin Ramkulh, thlanglei Laitlang Paletwa Peng chung 2020 October 26 le October 27 ah Myanmar ram Cozah ralkap le Rakhine ralkap AA hriamtlai phu hna voi hnih an i kaap than tiah thawng kan theih.
Hi kong he pehtlai in Paletwa khuami min langhter duh lo pakhat nih, “October 26 le 27 ah voi hnih an i kaap. Cun, Rakhine ram Minbya zong ah an i kaap ve. An i kah hi a caan cu a sau lo, minute chung te a si. Minungzeizat dah an i hliam i an nunnak a liam ti cu zei thawngpang hmanh kan thei lo,” tiah The Hakha Post ah a chim.
Atu an i kahnak hmun hi Paletwa Peng, Hnungbu khua pawng ah le Tinmachaung khua pawng ah a si tiah kan theih.
Cun, AA hriamtlai phu lei chimphuannak nawlngeitu U Khai Thu Khah nih, “Rakhine ram Minbya Peng chung le Chinram Paletwa Peng chung ah ralkap he hmaitonh kahdohnak a chuak. Paletwa Peng chung Hnungbu khua le Tinmachaung khua pawng zinglei sang ah a si. Ralkap lei in a thi mi le hliam a tuar mi cu an um nain minung pazeizatdah an si ti kan thei kho rih lo,” tiah a chim.
Paletwa Peng chung ah AA le Cozah ralkap kahdohnak ruang in Paletwa khuachung le Sami khuachung ah a zaam mi minung 7,000 leeng an um tiah theih a si.
