Nizaan nai ah a linsa ngai mi thawngpang Chin Ramkulh Cozah Minister pathum an rian hmun thlen ding ti mi cu anmah Minister pumpak nih nihin tiang an fiang rih lo, tiah May 15 ah kan theih.
“Atu hi Chief Minister Salai Lian Luai zong Nay Pyi Taw ah a um lio a si. President he an i tong ko i amah lawnglawng nih thlen ding le thlen lo ding ti cu a fiang hnga. Chief Minister zong nih a kan chimh ve lo ca ah kan hngal kho ve rih lo,” tiah Chin Ramkulh Cozah Lamsuul Minister Pu Sui Thio nih The Hakha Post ah a chim.
Minister rian hmun thlen ding kong ah Minister Pu Pau Lun Min Thang nih, “Thawngpang cu a leeng ko. Asinain, thawng fiang taktak cu kan hngal kho lo. A thlen cu an kan thlen tak te men ko lai,” tiah The Hakha Post ah a chim.
Hi Minister rian hmun thlen ding mi tiah thawng a leeng mi cu; Minister Pu Sui Thio, Minister Pu Pau Lun Min Thang le Minister Salai Isaac Khen an si. Pu Sui Thio hmun ah Pu Pau Lun Min Thang le Pu Sui Thio cu Salai Isaac Khen hmun ah, Salai Isaac Khen cu Pu Pau Lun Min Thang hmun ah thlen an timh hna ti mi thawngpang cu nihin tiang fehter a si rih lo, tiah kan theih.
TNLA ralkap thong khat leng nih Special Combat Training an lim
13 November 2024
