A ralai mi 2020 thimnak party le mizapi nih an ka duh rih ko a si ahcun, Chin Ramkulh lamsuul ka siaherh rih ca ah kaa zuam than ko lai, tiah atulio Chin Ramkulh Cozah Lamsuul Minister Pu Sui Thio nih June 24 ah a chim.
“Kannih hi cu kanmah duhpoh in thimnak ah i tel than awk a tha lo. Party le mizapi nih an kan fial ko a si ahcun ka ngandam ko ca ah kaa zuam than ko lai. Chin Ramkulh lamsuul zong zeimawzat cu kan tlamtlinh nain ka siaherh mi a tam ngai rih,” tiah Minister Pu Sui Thio nih The Hakha Post ah a chim.
Lamsuul kong ah Minister Pu Sui Thio nih, “Lamsuul hi a si khawh chung in Pyidaungsu Cozah zong nih papek mi a si ko. A si khawh chung in kan i zuam ve nain lam kilkawi tete remh than ding, kataza lam pawl zohfel deuh ding le lam pemh dih khawh rih lo mi pawl hi ka siaherh ngaingai. Cun, Senthang peng Loklung in Leipi tiang hi meng 60 hrawng a sau. Atu hi meng 10 hrawng lawng kan tuah khawh rih. Surkhua-Bungzung in Lei-um lei kalnak lam zong tlam a tling kho rih lo. Paletwa-Cikhat, Paletwa-Matupi lam pawl zong kataza ngaingai in kan phah khawh lo hmanh ah lung tal cu phah hrimhrim a hau mi an si. Hi lam pawl ka ruah ah ka siaherh peng rih i aa relrem ko ahcun 2020 thimnak ah i zuam than ka duh ko,” tiah a chim.
NLD Cozah kaika ah Chin Ramkulh Cozah nih kan caan chung ah khuate kip lam kan pemh lai, nan ti mi kha zeidah a lawh, tiah kan hal tik ah, “Hihi pawlisi an thlen than mi a si. Khuate pakhat ah minung 1000 umnak khua poh kha 2020 kum hlan ah lam pemhpiak dih ding. Minung 500 umnak kha 2025 kum hlan ah pemh ding le 2030 kum ah khuate dihlak lam pemh dih ding, ti tu khi a si,” tiah a cunglei Minister nih a chim fawn.
