Hotel le Khualtlawnnak lei thanchonak Zung nih a tuah cuahmah lio mi Chin Ramkulh khualtlawnkalnak a thancho nakhnga 4/2020 rian ceihhmainak cu July 1 ah an ngei i, Chin Ramkulh khualtlawnkalnak lei thanchonak Committee Chairman, Chief Minister Salai Lian Luai, Ramkulh Minister hna, Ramkulh Cozah Deputy Director U Toe Win le tuanvo ngeitu hna an kai, tiah kan theih.
Chief Minister Salai Lian Luai nih, “Chin Ramkulh chung kokek tlang, ti le ram aa dawhnak le minthang a si mi hmunhma hna siseh, khualtlawnkalnak a thancho khawh nakhnga siseh, a ra mi khualtlawng pawl an i nuamh nakhnga le an lung a tlin khawh nakhnga a lamkip in tuan ding kong ah ruahnak chuah cio ding,” tiah a chim.
Hi kong ah Chin Ramkulh Hotel le Khualtawnnak lei Committee Vice Chairman, Sipin Minister Pu Soe Htet nih, “Chin Ramkulh Khualtlawnak lei Thanchonak Committee 4/2020 rian ceihmainak a si i, Chin Ramkulh Peng 9 chung ah tlukruang tein khualtlawnnak lei a thancho nakhnga Hotel sakding, ngunkhuai pek ding, pawngkam zohkhenh ding kong le hi riantuannak ah Zungkip in i bawmh ding kong kan ceih mi a si. Khualtlawnnak lei a thacho khawh nakhnga zeiruang dah Zung kip in i bawmh a herh ti ahcun tahchunnak ah, khua leng vawlei kong a si ahcun, Vawlei Tahnak Zung le Zuatkhalhnak, Cinthlaknak le Thingram Zung tibantuk he aa pehtlai mi a si. Khua chung a si ahcun, Sipin le Pengkomh Zung he aa pehtlai mi a si ve. Cu tik ah, Khualtlawnnak lei rianrang tein a thacho khawh nakhnga Zung kip i bawmh ding kong kan ceih mi a si,” tiah The Hakha Post ah a chim.
