Chin Ramkulh, Khaikam Vui zuatnak hmun cu 2020 March 24 in an khar tiah Chin Ramkulh Thingram le Thingrua Chuahnak Zung Lutlai U Toe Chit sin in kan theih.
“2020 March 24 in khar hram kan thok. Aruang cu COVID-19 zawtnak nih kan ram tiang an kan phak cang ca ah kan i ralrin khawh nakhnga tiin kan khar mi a si. Zeitik tiang dah kan khar lai i, zeitik ah dah kan hon than lai ti hi thil a can ning zoh in mizapi sin ah kan thanh than te lai,” tiah U Toe Chit nih The Hakha Post ah a chim.
Khaikam Vui Zuatnak hi a liam cia kum 2019 February 16 in an tuah mi a si. An tuah ka in 2020 March 24 tiang ah ram chung ram leng in a rak leeng mi khual minung 37,000 an si cang. Hi minung 37000 chung ah minung 179 hi ramdang mi an si.
Hi Vui zuatnak hmun ah Vui a pali, a nu pathum, an dihlak fonh ah Vui pasarih an um. Ramdang mi ca ah luh man Kyats 20,000, ram chung mi Kyats 4,000 an laak i, kum 10 tang ngakchia tu cu luh man an la hna lo tiah kan theih.
