Chin Ramkulh huap Pengkua chung i thimnak zung riantuan minung 27 hna cu ralkap uk kan duh lo, ralkap sermi Cozah tang ah riantuan kan duh lo tiin zung kai lo Civil Disobedience Movement cawlcanghnak ah an i tel tiah theih a si.
Peng 9 chung thimnak zung riantuan CDM a tuah mi hna hi Ramkulh in minung 4, Hakha Pengkomh in minung 4, Hakha Peng in minung 4, Thantlang in minung 3, Falam Peng in minung 4, Tedim Peng in minung 1, Mindat Pengkomh thimnak zung in minung 1, Kanpetlet Peng in minung 2, Matupi Pengkomh thimnak zung in minung 2, Paletwa Peng in minung 2 le Tamu Peng in minung 1 an si tiah 2021 March 1 i cathanh an chuah mi chung ah hmuh a si.
Thimnak Zung riantuan CDM ah aa tel mi chung in min langhter duh lo minung pakhat nih, “Atu bantuk in ca kan chuah mi, CDM ah kan i tel mi hi ka rian in ka chuak. Ka rian in kaa din tinak a si lo. Mizapi nih thimmi Cozah a chuah tik lawng ah zung ka kai lai tinak a si. Aruang cu, ralkap kuttang ah riantuan ka duh lo ca ah a si. Atu kan doh mi ral hi kan tei khawh nakhnga hriamnam tha bik cu kanmah Cozah riantuan kan si ti ka theih ca ah CDM ka tuah,” tiah The Hakha Post ah a chim.
Thimnak zung in CDM a tuah mi minung 27 hna nih cathanh an chuah mi chung ah, “Mizapi nih anmah duhnak in thimfung an thlak i, thimnak a phichuak cohlang loin a hnongtu, hramhram in uknak a laa tu ralkap kuttang hrimhrim ah riantuan kan duh lo ca ah 2021 February 9 in CDM kan tuah. Pehzulh in kan tuah rih lai,” tiah aa tel.
Chin Ramkulh chung Pengkomh le Peng thimnak zung rian a tuan mi a tam deuh hi cu ralkap le rianngeitu hna nih an hren hna. Cun, 2020 kum thimnak phichuak zong Pengkip ah an rel than dih, chekhlatnak an tuah than dih tiah theih a si.
