Chin Ramkulh Hluttaw Palai hmun, hmun 39 chung ah hmun 38 ah aa zuam ding mi UDP party nih tutan thimnak ah Chin Ramkulh chung 75% teinak kan hmuh khawh tiah zumhnak kan ngei tiin UPD party Palai sin in kan theih.
“Tutan thimnak ah Chin Ramkulh chung in zatuak 75% tluk cu teinak kan hmuh hrimhrim lai tiah zumhnak kan ngei. Aruang cu, kan kalnak khuakip ahhin a kan dirpitu tu le a kan tanpitu hi an tam ngai. Nihin tiang Khuatekomh 150 an um cang. Hi bantuk in an kan dirpi ca ah zatuak 75% hi cu kan hmuh ko lai ti zumhnak kan ngei,” tiah Pu Tun Khan Kap nih a chim.
UDP party lei in tutan thimnak ah aa zuam ding mi Hluttaw Palai hi hmun kip ah kalter loin khuate kip i party Committee hna nih an cawlcanghpiak hna tiah thawng kan theih.
Hi kong he pehtlai in UDP party in tutan thimnak, Hakha Peng Amyotha Hluttaw No.11 ah aa zuam ding Pu Ceu Vung nih, “Kannih lei hi cu kanmah pumpak zong kan si khawh tawk in khuate ah kan kal pah ko. Hmundang tu ahhin cun Hluttaw Palai pawl an kal lo zong a si kho ko. Asinain kannih lei tu hi cu kan kal ko, thaizing zong khuate lei ah kal kan i tim,” tiah The Hakha Post ah a chim.
Tutan thimnak ah Chin Ramkulh chung in, Independent telh in ramkheel party 13 an i zuam lai. Hi chung ah Chin Ramkulh chung party ngan cem hi NLD, UDP, CNLD le USDP hna an si tiah kan theih.
2020 kum thimnak ah aa zuam ding party hna kong he pehtlai in U Lin Kyaw nih, “CNLD party in Hluttaw hmun 39 chung ah hmun 36, USDP in hmun 36, UDP in hmun 38, NLD in hmun 39 le UDP in hmun 38 hna an si. UDP party hi hmun 39 ning in ca an chiah ve ko nain pakhat hi amah tein ca chiah mi a laak than. NLD tang ah UDP hi a tam bik,” an si tiah The Hakha Post a h a chim.
United Democratic Party (UDP) hi Hnin-si party tiah min an bunh mi zong a si. Party a dirhtu le lutlai hi Kachin miphun mi U Zahkhuang Zung Sau (U Kyaw Myint) a si. 2010-2015 lio ahkhan Hluttaw hmun 80 ah an i zuam nain teinak an rak hmu lo tiah kan theih.
