Chin Ramkulh Hluttaw nih June 18-19 ah 2019-2020 tangka kum Revised Estimate (RE) budget an fehter cang, tiah tuanvo ngeitu sin in June 19 ah kan theih.
Hi an fehter mi RE budget hi 2019-2020 tangka kum budget in a si i, hmuh mi tangka 11.101 billion, hman mi tangka 171.690 billion le Ramkomh Cozah nih bawmh ding mi tangka 160.589 billion a si, tiah kan theih.
“Hi tangka pawl hi Department 25 nih anmah le an herhnak zawn cio, Chin Ramkulh thancho nakding ah an hmang lai,” tiah Chin Ramkulh Cozah Planning and Finance Minister Pu Vui Kaw nih The Hakha Post ah a chim.
Hi kong ah Hluttaw Palai Pu Van Thawng nih, “Hi RE budget hi a hman nakding hi Khuate thanchonak, Na-Ta-La, Electric mei, Cozah Zung herh, La-Wa-Ka, Ramkulh Hluttaw herh, Tayar Hluttaw herh, State Advocate General Zung herh, Cazin Chek Zung herh, Penguk herh le Zuatkhalhnak tibantuk ah hman an si lai,” tiah The Hakha Post ah a chim.
Tutan Chin Ramkulh Hluttaw meeting cu caanhmaan meeting si loin a biapi mi meeting ti a si i zeidang kong biatung dirh loin RE budget kong ceih le fehter in an dihter, tiah kan theih.
