Chin Ramkulh Hluttaw a voi 14nak caanhman meeting ah biatung dirh mi budget fehter a si rih lo

A voi 14nak Chin Ramkulh Hluttaw caanhman meeting cu June 8 ah an tuah i biatung dirh mi 2018-2019 tangka kum budget kong an fehter kho lo, June 11 ah fehter ding in a ni an thawn, tiah tuanvo ngei sin in June 8 ah kan theih.

“Tutan kan meeting hi budget kong kan ceih. Asinain, cu zat kha zat ti pawl cu a fiang kho rih lo. Cucaah, a ni kan thawn i June 11 ah kan fehter te lai,” tiah Chin Ramkulh Hluttaw Chairman Pu Zo Bawi nih The Hakha Post ah a chim.
Hluttaw meeting a ni thawn mi le biatung fehter khawh rih lo mi kong ah USDP Hluttaw Palai Dr. Hmuh Thang nih, “Kan ruahning cio aa kheel ca ah a ni thawn hi a si. Budget kong lawng a si lo, Matupi ah khualbuuk sak ding, Falam khuachung dinti peknak tibantuk zong aa tel i aa relrem deuh lo ca ah meeting a nicaan thawn a si,” tiah The Hakha Post ah a chim.
“Tutan Hluttaw caanhman meeting ah buaibainak a um lo. Budget kong deuh a si i a biapi ngaingai. Amah belte department cio ah a herh mi budget chap ding, zuh ding le fehter ding ti pawl cu a fiang kho rih lo i June 11 ah kan fehter te lai,” tiah USDP Hluttaw Palai Pu Van Thawng nih The Hakha Post ah a chim.
Tutan Hluttaw caanhman meeting ah 2018-2019 tangka kum budget kong an ceih i 144 billion in an suaisam. 2017-2018 tangka kum ahcun 136 billion hrawng lawng a si, tiah kan theih.