Chin Ramkulh dihlak July 1 tiang Facility Quarantine chiah mi minung 1043 an um cang tiah Chin Ramkulh Ngandamnak Zung lutlai Dr. Aung Ngwe San sin in July 2 ah kan theih.
Chin Ramkulh Ngandamnak Zung lutlai Dr. Aung Ngwe San nih, “Chin Ramkulh dihlak Facility Quarantine chiah mi minung 1043, le Home Quarantine chiah mi minung 1414 an um cang. Facility Quarantine chiah mi minung chung in minung 5 nih COVID-19 zawtnak an ngeih. Hi minung 5 hi ramdang lei in a tlung mi lawng te an si. Case 150, Case 182, Case 200, Case 201 le Case 232 an si hna,” tiah The Hakha Post ah a chim.
“Chin Ramkulh chung Facility Quarantine chiah mi July 1 tiang ah minung 143 an taang rih. Minung 900 Facility Quarantine in an chuak cang. Chin Ramkulh dihlak a hramthok in COVID-19 zawtnak a ngei mi minung 10 an um i minung 9 an dam than cang. Minung pakhat a taang i Hakha sii-inn ah a um lio a si,” tiah Chin Ramkulh Ngandamnak Zung lutlai nih a chimchap.
Facility Quarantine chiah mi chung ah minung pakhat a thi. COVID-19 zawtnak ruang ah si loin raifanh zawtnak in a thi. A thih hnu ah a thi kan chek i raifanh rungrul thazaang a thawng tuk mi phunhnih hmuh a si tiah Dr. Aung Ngwe San nih a chimchap.
