Chin Ramkulh Cozah nih an riantuan ning le Hluttaw kar pehtlaihnak kan ngeih mi hi Hluttaw Palai hna kan lung a tling bak lo tiah Chin Ramkulh Hluttaw Vice Chairman U Aung Than nih a chim.
“Hluttaw Palai hna nih atu upadi a suallam kan chuah mi le Cozah lei nih sullam an i fian ning hi aa kalh lengmang tawn. Cozah lei nih an riantuan ding mi budget pawl zong Hluttaaw meeting kan tuah lai ni 2 hrawng aa duh ah an kan pek, an riantuan mi zong dingfel le tlamtling in a um lo tik ah Hluttaw Palai hna nih chekhlatnak kan tuah peng rih. Cozah lei nih Hluttaw meeting tuah hlan a thla aa duh hrim ah an kan pek a hau. Atu tiang ahcun kan lung an tling deuh lo,” tiah Chin Ramkulh Hluttaw Vice Chairman U Aung Than nih February 16 Chin Media he tonbiaruahnak ah a chim.
“Cozah lei nih eihmuarnak zong hi kan duh ning in an doh kho lo. Eihmuarnak hi khoika dah a um ti cu chim hau lo in a fiang ko. Eihmuarnak hi faak deuh in doh hna seh ti ka duhpiak hna. Atu tiang ah eihmuarnak in thongthlak khawh mi zong an um lo. Biaceih zung zong ah chuahpi mi an um rih fawn lo mi hi khuaruah har ngai cu a si. Eihmuarnak a um lo mi le a si fawn lo. Rampi nih thlak mi budget kong ah Ramkulh Cozah nih a thenphawt ning hi a tha a der tuk fawn. Hluttaw lei zong nih a si khawh chung in chekhlatnak siseh, a dangdang upadi lei zong fakpi kan i zuam bantuk in Cozah lei zong nih an rian kong ah faak deuh in an i zuam i zapi sin ah thawng dik an thanh awk a si,” tiah a cunglei upa nih a chimchap.
