Chin Ramkulh, NLD nih kum nga chung a hruainak ah peng khat le peng khat tangka a suaisam ning, a phawt ning zoh ahhin ka lung a tling lo ngai tiah Chin Ramkulh Cozah lei Chimphuannak Nawlngeitu Sinpin le Electric Minister Pu Soe Htet nih a chim.
Sipin Minister Pu Soe Htet nih, “Keimah leikap in siseh, mizapi lei in siseh Chin Ramkulh Cozah a lung a tling lomi le a duh lomi kan tampi theu lai dah. Tangka phawtzamhnak le suaisamnak lei ah tlukruan nak a um lo ti hi kan chim cio theu lai. Aruang cu peng khat le peng khat milu zat zong aa khat lai lo, lamsuul lei aa khat lo. Cun, Ramkomh nih rian khinh mi simanking a ngan deuh pawl hi College sak ding, zaanglek zung sak ding ti bantuk lawng an si. Hi pahnih hmanh ah budget phawtzamh ning tlukruannak a um lo,” tiah The Hakha Post ah a chim.
Chin Ramkulh Cozah nih tuan ding simanking an suai mi ah an chimmi le an tuah mi, an tuan mi aa dang tuk, tlukruangnak zeihmanh a um lo tiah Chin National League For Democracy Party (CNLD) in Matupi Peng Hluttaw Palai Salai Aung Lian nih a chim.
Salai Aung Lian nih, “Simanking hi milu a tam deuhnak hmun ah kan tuah an ti. Milu tam deuhnak ah tuah tak hna sehlaw Paletwa ahhin a tam cem a kal zungzal ding a si. Cun, Tedim, Matupi, Hakha hna ahhin tam deuh an ngah zungzal ding a si. Asinain an chim ning le an tuan mi zeihmanh tlukruannak a ngei hrimhrim lo,” tiah The Hakha Post ah a chim.
Thil tha kan tuah, kan tuan tiah kan i ruah mi cung ah mizapi sin in soiselnak le thangchiatnak hi a um pah tawn. Hihi an mawh ve hrimhrim lo, Cozah lei thil kan tuahser ning hi a that lonak tampi a um ve. Tlukruangnak a um lonak tampi a um ve tiah Pu Soe Htet nih a chimchap.
