The Hakha Post thawngzamhca hmang in Chin Ramkulh Cozah nih thanh lengmang mi, 2018 January thla thawk in ramsa kah ti lo ding le kan tuuhual a him nakhnga an thanh lengmang mi cu pehzulh in an tuan cuahmah, tuanvo ngeitu sin in March 2 ah kan theih.
“Kan rak thanh lengmang bantuk in phungphai le nawl a zuul lo mi cu dantat hrimhrim an si lai. Hi kong ah biapi in khuate khuabawi kha tuanvo ngei bik an si. Khuate khuabawi zong an fel lo ahcun dantat thiamthiam an si lai. Sakah kan khap tik ah a kaaptu lawng si loin an kah mi sa a zuartu zong dantat an si ve lai. January thla thawk khan kan tawlrel cang ca ah sakaap le a zuartu tiang, khuate khuabawi tiang nih ralring tein an tawlrel i an zulh a herh cang,” tiah Chin Ramkulh Hluttaw Chairman Pu Zo Bawi nih The Hakha Post ah a chim.
“Hihi ralkap bantuk in dantat i tlaihkhih hnu ah thongthlak ti bantuk tiang in tuah phung zong a si lo. Kan khuaram thanchonak ca ah a herh tuk mi le Chin Ramkulh Cozah zong nih 2018 kum chung kan i hmaithlak mi rian biapi taktak a si tik ah kanmah Cozah dantat ding tihnak ruang lawng ah si loin mahle hngalh khawhnak cio in kan zulh ding le kan tuah ding mi rian biapi taktak a si,” tiah a chimchap.
Hi sakah an khap mi le tuuhual thingram duah le hau te hna an khap mi hi Myanmar ram Ramthen le Ramkulh hna lak ah Chinram cu sifak bik kan si i sakah le tuuhual runvennak thawng in thli thiang dawpnak in ngandamnak ca ah siseh, a hmun mi dumhau tuah khawh nakding in pawcawmnaklei ah thancho nakding ah siseh, atu bantuk in Chin Ramkulh Cozah nih sakah khap le tuuhual runvennak a tuah hi a si, tiah a cunglei upa sin in kan theih.
