Cozah ralkap le AA hriamtlai kahnak ruang ah Paletwa Peng Kintalin khuami 54 a luat mi hna hi Miza khua ah an i dor chung, Chin Ramkulh Cozah zong nih a si khawh chung in kan ruahpiak ko hna, tiah Minister Pu Soe Htet nih August 7 ah a chim.
“An khua Kintalin i kir than ding hi cu AA ralhmun a si ca ah a si thiam ti lo. Chungkhar pali cu Paletwa ah hmun kan pek hna i an um cang. A taang mi hi Miza khua ah an i dor. A ngaingai cu Miza khua an i dor mi hi an ca ah a tha deuh. A ruang cu Miza khua hi khuapi sinak hmu kho ding in timhtuah cuahmah mi a si. Lamsuul a tha, ti le mei a tha. Sianginn zong High School a um. Khuatekomh Sii-inn zong a um i an ca ah a tha deuh mi a si,” tiah Chin Ramkulh Cozah Sipin Minister Pu Soe Htet nih The Hakha Post ah a chim.
Paletwa Peng hartong hna bawmhchanhnak hi a tam ngaingai cang nain i zaat ngaingai a um kho lo. Pyidaungsu Cozah sin zong ah bawmhnak halpiak chap ding timh a si. Ramchung ramleng, Chin Ramkulh Cozah, Pyidaungsu Cozah, NGOs, CSOs le pumpak nih hartong bawmhnak an pek mi hi tangka in tuak ahcun Kyats sing 8000 in 10,000 hrawng a si, tiah a cunglei Minister nih a chimchap.
