Chin ramkulh Cozah nih Chin Ramkulh chung i Cozah riantuan, dawr tuah mi, dum le lo a tuah mi le satil a zua mi minung 133 hna sin ah thiamhlei laksawng le roca a pek hna tiah theih a si.
Ramkulh Cozah nih atu bantuk in thiamhlei laksawng le roca a pek hna hi a voi khatnak a si i, minung 133 nih an co.
Hi kong he pehtlai in Chin Ramkulh, Chief Minister Salai Lian Luai nih, “Atu bantuk in thiamhlei laksawng le roca Ramkulh Cozah nih kan pek hna hi a voi khatnak a si. Kan pek hna ningcang zong hi, Chin Ramkulh thanchonak lei ca ah rian a tuan mi, dum le lo lei a tuan mi, zungthiamnak lei a tuan mi, dawr a tuah mi hna le set-hmu let-hmu lei ah a thiam mi hna tiin then a si i, minung 133 sin ah hi laksawng le roca hi kan pek hna,” tiah 2021 January 4 ah a chim.
Cun, atu bantuk in laksawng le roca pek mi hi pehzulh ding le kan ram hi democracy federal pyidaungsu pi ah ser kho ding le remdaihnak lei ah biatak in tuan kan timh lio ah, a dang tlangcung mi hna he hmunkhat te ah riantuan ti kho ding in Chief Minister Salai Lian Luai nih a chimchap.
Chin Ramkulh chung Cozah riantuan, dawr tuah, dum le lo tuah, satil a zua mi hna sin i thiamhlei laksawng le roca peknak hi Myanmar ram Independent Day January 4 ah Cozah lutlai hna nih an pek hna. Laksawng an pek mi hna hi medal pahnih le tangka le roca in a si tiah kan theih.
