Chin Ramkulh Cozah nih COVID-19 zawtnak Chin Ramkulh chung ah a karh nakhnga lo Zung kip, rian ngeitu hna le mizapi sin ah a hlankan in runven a herh ca ah, i runven ning le zulh ding cu 2020 March 24 ah a chuah.
“Chin Ramkulh, Ramkulh huap phu, Pengkomh huap phu, sang le khua khuabawi hna nih mibu in tuah mi puai, tonbiaruahnak puai, chimphuannak puai le training tibantuk tuah lo ding. Hotel, Motel, Khualbuk hna nih rian he pehtlai in tonbiaruahnak, biaknak lei puai, zatlang puai le puai dangdang zong cathanh kan chuah than hlan tiang tuah lo ding. University, College le B.H.S sianginn hna, Fimcawnnak Zung nih nawl peknak a pek mi sianginn hna, Private Sianginn hna zong Fimcawnnak Zung nih zulhphung a ser bantuk tein zulh ding le pumpak a sawng zong Cozah nih cathanh a chuah than hlan tiang hon lo ding. Social Welfare, Relief and Resettlement (Luhmuh-vuanthan) Zung nih a tuah mi tualleng sianginn le nawlpeknak tang ah a um mi zong nih Social Welfare, Relief and Resettlement Zung zulhphung ning in zulh ding,” tiah Cozah nih a thanh.
“KTV, Karaoke dawr hna khar dih ding, thil manfak in zuar lo ding, eidin dawr ah parsel in zuar ding, mizapi in tuah ding mi puai le kawl titawih puai, biaknak lei puai, zatlang puai le puai dangdang zong tuah lo ding, zarhfatin biakinn pumh le phungki sianginn ah mibu in thutdir tawn mi biaknak lei pumh khawmh cu cathanh a chuah than hlan tiang tuah lo ding, mizapi nih a si khawh chung in mahle inn chung cio ah um ding, mizapi thinphanter ding in thawng hman lo le thawng dik lo thanh lo ding, thanh ahcun hman lio mi upadi ning in sualphawt ding, Chin Ramkulh chung mizapi nih COVID-19 zawtnak a hlankan in i runvennak le zawtnak a karh nakhnga lo Ngandamnak le Zaanglek Zung nih a thanh bantuk tein zulh ding, nan pawngkam ah lunghrinh mi an um ahcun a naihniamnak bik Ngandamnak Zung le khuabawi sin ah thawngthanh ding,” tiah Chin Ramkulh Cozah nih thawng an thanh.
Sang le khuate hna nih an theih khawh nakhnga Pengkomh le Peng chung ah khuabawi le tuanvo ngeitu hna nih, mich hman in mizapi sin ah thawngthanh le sangmi le khuami hna nih Ngandamnak le Zaanglek Zung nih a thanh bantuk tein zulh ding a si lai. Hi cathanh hi 2020 Marchc 24 in 2020 April 30 tiang a hmun mi cathanh a si, tiah Chin Ramkulh Chief Minister Pu Salai Lian Luai le Social Affairs Minister Pu Pau Lun Min Thang nih min an thut mi cathanh a si.
