Chin Ramkulh Cozah nih January thla thawk in Taungzalatt Times thawngzamhca a chuah mi cu Chin Media cheukhat nih an soisel i duhlonak cathanh zong an chuah tiah thawng kan theih.
“Hi thawngzamhca an chuah mi cu Cozah nih a tuah awk hrimhrim a si lo. Cupin ah Minister pakhat nih hruai in thawngzamhca chuah hi khuaruah har ngai a si. Riantuan ding tampi um lio ah atu bantuk an tuah hi cu ka lung a tling lo. Chin Media zong kan tampi ko bu i thawngpang hmanh tha tein kan chim lo i anmah nih thawngzamhca tiang an chuah mi hi cu ka lungtling lo. Cozah nih a chuah mi a si tik ah Kawlca in chuah a si i careltu ca zong ah thathnemnak a um lo. Anmah chuah mi a si bantuk in anmah le riantuannak le anmah ruah ning deuh an chuah lai cu a fian ko ca ah a herh bak lo,” tiah Chin Media Network Director le Chin World Editor Salai Hung Tun Gye nih The Hakha Post ah a chim.
Hi kong he pehtlai in Khonumtung Editor nih, “Cozah lei nih thawngzamhca chuah cu a si kho bak lo. Anmah le anmah an i mualphoh a si tiah ka ruah. Chin Media kan tampi ko mi zeirel lo zong a si,” tiah a chim ve.
Taungzalatt Times hi Chin Ramkulh Cozah nih a voi khatnak lawng a chuah rih mi a si i Minister Salai Isaac Khen hruainak in an chuah mi a si tiah thawng kan theih.
“Media cu a zalong mi a si bantuk in Cozah siseh, Khrihfabu siseh NGO tibantuk nih a tlaih awk a si lo. Media cu rampi ca ah a palinak inntung (The Fourth Estate) a si bantuk in inntung pathumnak ah a um cang mi Cozah nih a palinak inntung an tlaihchih ding cu a si kho bak lo mi a si. Chin media hmanh nih thawng kan hal hna i an kan pek khawh lo lio ah anmah nih an chuah ve mi hi cu anmah i thangthatnak le anmah riantuan mi pawl langhternak duh ah a si ko lai. Cozah nih tuan ding mi a tam tuk lio i hi bantuk tuah hi cu a herh ah ka ruat lo,” tiah The Chinland Post In charge Editor Salai Ngun San Aung nih The Hakha Post ah a chim.
Hi kong ah The Hakha Post Chief Editor Pa Pui nih “Chin Ramkulh Cozah nih hi tluk in media lei tha an pek ko ahcun anmah nih tuah loin Chin Media pawltu hi thazaang kan pe seh, a thancho nakding ah lam kan sialpiak sehlaw a tha deuh. Cozah pakhat nih rammi tangka hmang in media a dirh mi hi cu Cozah pakhat nih rian lo rian an chuahpi tiah ka ruah,” tiah a chim ve.
Chin Ramkulh Cozah nih Taungzalat Times a chuah mi kong ah Myanmar ram huap in media riantuan mi Myo Aung Kyaw nih, “Cozah lei nih an chuah ti mi hi cu a tha lem lo. Cozah lei riantuan ding cu aa dang tuk mi a si ko. Thawngthanhnak lei ti ah le Thawngthanhnak Zung an um ko ca ah a herh bak lo mi a si. Hi an hman hnga ding budget in Ramkulh thanchonak lei hi hmang hna seh law a tha deuh. Cozah lei nih chawlehthalnak ah hman an timh maw si cu ka hngal lo nain media in chawlehthal timh cu a tha lo bak mi a si. Chin Media tampi ko ca ah hi tu hi tha pe hna sehlaw a tha deuh” tiah a hmuh ning a chim ve.
Chin Ramkulh Cozah nih chuah mi Taungzalatt Time hi mi cheu khat sin ahcun a phan cang nain mi tam deuh sin ah atu tiang a phan rih lo. Online chung ah cun tampi nih rel i hmuh khawh a si cang.
