Chin Ramkulh Cozah nih Ponetaung Ponengya in Hakha Peng Bungzung tiang tlanglawng lam pemh ding rian biapi aa hmaithlak.
“Rian timhlamhnak a um. Ponetaung Ponengya ah a hlanpi in lam rak pemh cia mi a um i cucu hman a si lo. Minung aa ciit ding an tlawm ca zong ah a si men lai dah. Hi lam hi thilri hram pawl a si mi meihol, lung meihol phurhnak tibantuk le a dangdang thilri phurhnak ca ah i hmang sehlaw tangka a dih mi tampi aa hlep lai. Chin Ramkulh Cozah nih rian biapi ngai in aa hmaithlak ko,” tiah Chin Ramkulh Cozah Chimphuannak Nawlngeitu U Soe Htet nih The Hakha Post ah a chim.
Hi tlanglawng lam timhlamh mi cu Bungzung mirang vawlei chuahnak sehzung hmun hnih ca ah caan sau a nguh ding mi kuatphurhnak lam a um ve khawh nakding zong lam pemh ding i timh mi a biapi ah aa tel ve, tiah kan theih.
“Tlanglawng lam pemh nakding rian thawk ding hi 2019-2020 tangka kum ah cun suaisam a si rih lo. Zeitik set ah rian aa thawk te lai ti hi fiang in ka chim kho lo nain Chin Ramkulh Cozah nih timhlamhnak cu a ngei ko,” tiah Minister U Soe Htet nih a chimchap.
Chin Ramkulh Cozah nih Chinram chung khuate lam pemh dih ding, electric mei hmuh dih ding, Falam Surbung vanlawngbual, Bungzung mirang vawlei chuahnak pawl hi biapi ngai in aa hmaithlak mi rian an si.
Theihternak le ralrinpeknak: The Hakha Post hnatlaknak tel lo in kan thlah mi thawngpang i tlen le hman kan siang lo.
