Hakha khua ah phungning loin sak mi tiah chiah mi inn pohpoh cu August 17 thawk in an thehpiak taktak cang hna lai, tiah tuanvo ngeitu Minister pakhat sin in August 5 ah kan theih.
“Tuan deuh ahcun August thla thawk bak ah khan theh ding kan ti nain HCMF in Pastorte he tonbiaruahnak kan ngei i an kan nawl ca ah a nicaan kan thawn i August 17 tiang kan hngah rih hna lai. Khi ni tiang amah tein a thet hlei lo mi cu an inn kan thehpiak taktak cang hna lai. Upadi ning tein kan tuan mi a si ca ah hnupil kan i tim lo. Kan theh taktak cang ko lai. Kan theh lio ah media zong luh khawh a si te lo men lai,” tiah Chin Ramkulh Cozah Lamsuul Minister Pu Sui Thio nih The Hakha Post ah a chim.
Hi kong ah HCMF Chairman Rev. Joel Nawl Cung Lian nih, “Chin Ramkulh Cozah nih an kan auh i minung 9 kan va kal. Upadi ning tein rian an tuannak an kan chimh. Cun, an kan auhhnawhchan taktak cu hi rian hi kan tuan taktak cang lai ca ah Khrihfa biaknaklei upa hna nih kan theihpi ve u, cun ruahnak zong kan pe u, tiah an kan auh mi a si. Inn sa zong nih upadi ning tein kan sak ve. Cunglei tiang phanh kan ngamh an ti. Chin Ramkulh Cozah zong nih upadi ning tein kan tuan an ti tik ah ahodah a palh, ahodah a sung te lai, ti mi tu cu kan fiang kho cio lo. Zeiti a si hmanh ah thla khat tal cu hngak rih ko hna u, tiah kan nawl hna i atu bantuk in a nicaan an thawnpiak mi hna hi a si lai,” tiah The Hakha Post ah a chim.
Hi inn theh ding mi kong ah, “Hakha khuapi sang 8 chung in minung thazaang 60, Palek 50, Meithat zung riantuantu 30, Sipin 50, Peng sakhaan 7, La-Wa-Ka 6, Thingramlei Zung 6 le Sii-inn motor tibantuk i bawm in an theh lai,” tiah VOM Social Media nih a tial.###
