Chin Ramkulh, Labor, Immigration of Population Minister Pu Phwe Arr Motor cu 2020 March 22 suimilaam 10:30 am tluk, Mindat khua chuah hauka pawng lam thlang pe 300 leng a thuhnak horkuang ah a tla i a fapa telh in minung pathum fak ngai in hliam an tuar tiah kan theih.
Hi kong he pehtlai in Minister Pu Phwe Arr nih, “Ka fapa le ka tupa telh in Mindat lei ah kan tlawng. Mindat ah caan sau nawn kan um hnu ah 2020 March 22 Hakha lei ah kir ding in kan i thawh. Mindat in kan i thawh i khua chuahnak hauka pawng kan phak ah thil kan philh sual mi a um i ka va kirter hna. Kei hi thil kan philh mi va lak ah ka zul ti hna lo, ka tum i mi pakhat he lam ah bia kan i ruah. Kan Motor aa lehnak hi lam thlang ah a si i pe 400 dengmang a thuk. Motor chung ah ka fapa, ka tu pa le motor khal pa an i cit. Ka fapa hi a lu ah hliam a tuar i hmun tam ngai in an thitpiak. Amah hi a fak cem a si ca ah thinphang ngai a si. Ka tupa hi a ban ah fak ngai in a tuar ve, cun, motor khal pa hi a keng ah hliam a tuar ve i an pathum tein Mandalay sii-inn ah kan kalpi colh hna,” tiah The Hakha Post ah a chim.
Minister Pu Phwe Arr hi Mindat a tlawn pah ah ral ruang i harnak a tong i Mindat sii-inn a phan mi ralzaam minung 12 hna sin ah kyat 50000 cio pumpak in bawmhnak a pek hna tiah kan theih.
