January 17 kan cachuak ah 2017 kum chung The Hakha Post thawngserbiktu hna minung pali; Pu Zo Bawi, Pu Thla Hre, Pu Sui Thio le Pu Pau Lun Min Thang an si i atu zong Chin Ramkulh Cozah lutlai hna sin in thawngserlobiktu kan rak langhter than. Media dang le thawngzamhca dang sin ahcun thawng an ser len ko nain The Hakha Post ca ah cun a tanglei kan langhter mi hna hi thawng a ser bal lo mi, ti khawh an si.
Pu Salai Lian Luai
Chin Ramkulh Chief Minister Pu Salai Lian Luai hi media dangdang le Falam hrambunh media nih cun tonbiaruahnak an ngeih khawh lengmang nain Hakha hrambunh media nih nihin tiang voi khatte hmanh kan tong kho bal lo. Ni Sunglawi caan, puai caan tibantuk i bia a chim mi pawl kan tialpiak chin mi dahlo thawngpang a ser lo hrimhrim ti khawh a si. Ramkulh Chief Minister pakhat a si bantuk in media nih fawizaang tein kan ton khawh lai ti hi kan ruat bal lo i a si khawh chung in amah ton ding ah ca zong kan tial. Asinain, amah hmurka le awkate theih in thawngpang a kan pe bal lo i kan tial bal lo. Democracy ram ah media zalonnak hmang in mizapi le careltu kha a fianghlang mi thawngpang thanh le thawng theihter cu media kan rian a si nain nihin tiang cu Chief Minister awka kan lenter kho rih lo. 2018 kum chung tal ah Hakha hrambunh media pawl hi a kan ton te theo lai, ti cu ruahchannak kan ngei.
Salai Isaac Khen
Chin Ramkulh Sipin Minister Salai Isaac Khen hi media le a riantuannak cu kanmah nakin aa fiang deuh lai, tiah kan ruah. Amah belte, media dang le thawngzamhca dang ahcun a awka a leng lengmang ko. The Hakha Post tu nih cun nihin tiang hmaitonh in bia kan ruah kho bal lo i kan tong kho bal lo. Amah facebook cahmai i a thlah mi thawngpang kan lehchin mi, Ni Sunglawi le puai caan i a biachim mi pawl kan tialchin mi dahlo nihin tiang The Hakha Post ah a awka a leng ve lo. Minister pakhat a si ca ah fawizaang tein kan ton khawh lai, ti cu kan i ruat bal lo nain a Zungkhaan ah kan va hngah, kan va ton timh lengmang nain nihin tiang cu kan tong kho hlei ve rih lo. Chin Ramkulh Cozah Minister hna lak ah media le a riantuannak aa fiang bik mi a si theo lai tiah zumh mi a si bantuk in 2018 kum chung ah cun The Hakha Post nih kan ton khawh theo lai tiah kan i ruahchan.
Minister Gen. U Kyaw Kyaw le Minister Col. U Han Win Aung
Chin Ramkulh Cozah Boarder Affairs Minister hlun Gen. U Kyaw Kyaw hi a caan chung ah voikhatte ton cu chimlo, a Zungkhaan kutkaa ah media nih ka tong hlah u, tiah ca a taar. A thar a rak luut mi Minister Col. U Han Win Aung belte, hi Chin Ramkulh Cozah nih kum khat chung an riantuan mi thawngfianternak an tuah mi he pehtlai in a fiangfai lo deuh mi tete kong ah The Hakha Post Chief Editor nih voi khatte a rak ton khawh bal. A hnu ahcun, an Public Service Officer (PSO) pawl nih, thawngpang hal nan duh mi kha ca in rak tial ulaw, an leh khawh hna ahcun an leh hna lai, tiah an kan ti tawn. Cucu, democracy chan ah a fianghlang mi (Transparency) he aa hlat ngaingai mi a si. 2018 kum chung tal ahcun kan ton khawh te theo lai, tiah kan i ruahchan.
Thawng a ser tuk lo nain kan ton khawh pah lengmang mi hna
Minister Pu Vui Kaw hi a minung sinak hrimhrim ah mitha le mi lungneem a si ti cu hngalh khawh a si. Aa manh caan pohpoh ahcun amah kan ton pin ah phone zong in thawngpang kan hal khawh mi a si. Minister Pu Mang Hen Dal hi voi thlumli cu kan ton khawh nain an rian tam ve ca ah duhning in kan tong kho bal lo. Ramkulh Lutlai tam deuh kan ton khawh hna, Peng Lutlai upa deuh kan ton khawh hna i khuabawi pawl zong kan ton khawh ko hna.
Biakilh:
“Nanmah The Hakha Post nih ton theng kan herh lo,” an ti khawh men. Cun, careltu zong nih anmah ton thengtheng cu a herh maw, nan kan ti ve khawh men. A ngaingai cu, democracy ram ah media zalonnak le Cozah riantuantu le mizapi karlak ah a fianghlang mi pehtlaihnak cu media a si kha kan philhlo a herh. Cucaah, nihin tiang kan ton khawh rih lo mi hna kan pale hi kan uhtanh peng hna nak a si.
(By: Salai KB Laikhal)
