Chin Ramkulh Cinthlaknak Zung nih Fuur chung ah Chinram khuapi kip le khuate kip ah lingmaw kheu thonghra leng a zamh lai, tiah kan theih.
Hi bantuk in thlai kheu zamhnak cu amah le khuacaan kal ning in cin awk a tha mi phun poh kha kum fatin zamh a si i tu kum Fuur chung i lingmaw kheu zamh ding mi hi a voi khatnak a si, tiah kan theih.
“Kum dang ahcun coffee kheu tibantuk in kan zamh tawn nain tutan lingmaw kheu hi cu a voi khatnak a si. Coffee kheu 300,000 leng zong kan erh i cu zong cu zamh thiamthiam ding a si,” tiah Chin Ramkulh Cinthlaknak lei Zung Lutlai U Linn Myat nih The Hakha Post ah a chim.
Ramkulh huap, Pengkomh huap le Peng huap tibantuk in cinthlaknak lei kong cawnpiaknak zong mahle tuanvo ngeih ning cio in tuah a si, tiah kan theih.
“Fianghlang tein chim ahcun hibantuk in kum fatin thlai kheu kan zamh mi cu zatuak 50 tluk lawng kan hlawhtling. Asinain, tu kum in cun zulhphung thar kan tuah. A dum tha tein a kulh lai, a dum kha thlai cinnak ca ah tha ding in tlamtling tein a tuahcia lai, tibantuk in zulhphung kan ser. Thlai cu cin tik ah a dihlak in a nung ti hi a har ngai i kha bantuk a tong mi chung in cin than a duh mi kha papek an si. Tukum ah kan hlawhtlinnak kaiter than ding kan timh,” tiah U Linn Myat nih a chimchap.
Cinthlaknak lei Zung nih thlai kheu a zamh tik ah, a phu in riantuan mi le company tibantuk in riantuan mi pawl kha papek in thlai kheu a pek hna, tiah kan theih.###
