Chin Ramkulh chung ah COVID-19 zawtnak in kan i runven khawh nakhnga le hi zawtnak he pehtlai in a herhnak zawn ah hman ding in Ramkomh cozah nih Chin Ramkulh ca ah kyats 1 Billion Budget a pek.
Hi kong he pehtlai in Chin Ramkulh Cozah Director U Than Tun Sein nih, “Covid-19 kong he pehtlai in Chin Ramkulh cozah lei nih mizapi sin ah chimphuannak le biaruahnak zong hlan kan tein kan rak tuah cang. Covid-19 zawtnak ca ah a herh ning hman ding in Ramkomh Cozah nih Myanmar ram chung ramthen le ramkulh ah kyat 1 Billion cio Budget an kan pek.Ramkomh cozah nih a kan pek mi tangka 1 Billion hi kanmah kut chung ah a um cang ko nain kanmah nawl in hman ding hi, phung nih an onh hlan ahcun kan rak hmang ngam lo. Asinain, hi tangka hman khawh nakding ah Chin Ramkulh Chief Minster Pu Salai Lian Luai nih 2020 March 24 ah President a ton i a herh ahcun a herh ning in hman khawhnak nawl an kan pek cang,” tiah The Hakha Post ah a chim.
Atu bantuk in zawtnak a chuah ruang ah Tedim peng Kaptel khua kal nak lam cu Lock Dawn ah an chiah cang. Cun, 2020 March 25 ah Chin ramkulh Cozah Sipin Minister Pu Soe Htet le Minister Pu Pau Lun Min Thang telh in cozah lutlai cheukhat Tedim peng, Kaptel khua ah kal in a herhbau mi pawl bawmhnak an va pek lai tiah kan theih. Myanmar ram chung ah Covid-19 zawtnak a ngei mi minung 3, lunghrinh mi minung 215 le zawtnak a ngei lai tiah zumh mi minung 2 an si cang tiah kan theih.
Cun, “Atu bantuk in zawtnak a chuah hlan ahhin cun tangka hman ding hi kanmah Chin Ramkulh cozah Budget in kyat sing 200 le mizapi sin in kyat sing 90 lawng Budget kan ngei. Asinain atu bantuk in zawtnak nih a kan phak tak cang ca ah 2020 March 24 suimilaam 9:00 am cozah lutlai cheukhat biaruahnak kan ngei i Ramkulh cozah nih kyat sing 800 Budget chiah ding in biachahnak kan tuah. A dihlak fonh ah Chin ramkulh in a chuak mi tangka hi kyat sing 1100 deng a si. Hi kyat sing 1000 leng hi a bik in atu zawtnak a chuahnak hmun Tedim peng Kaptel khua ah a herh ning in kan hman lai,” tiah a chim chap.
