Chin Ramkulh chung ah a voi khatnak mee cazin an tar mi a zohtu minung sing khat leng chung ah mee cazin remh than mi le mee cazin chung ah aa tel mi a tlamtlin lo ca ah dodalnak, duhlonak an langhter mi minung dihlak tong 30 deng an si tiah Chin Ramkulh Thimnak Zung in kan theih.
Mee thla kho dirhmun a si ko nain mee cazin tar mi ah a min aa tel lo ca ah Form 3 in remh than mi minung 1443, Mee cazin ah telh awk a tlak lo tiah dodalnak a tuahtu Form 4 in minung 12,467 le mee cazin an tar mi chung ah aa palh mi Form 4C in remh than tu minung 16,040 an si i, an dihlak remhthan mi le dodalnak an rak tuah mi hi minung 29,950 an si tiah Pu Uk Nawl sin in kan theih.
“A Htwe Htwe Zung in minung cazin an lak. Cazin an lak lio ahhin nulepa um lo, cun lo ah a kal mi ti bantuk pawl zong an um lai. Thil sining tlamtling tein a chim kho lo zong an um lai. Cheukhat hna cu a thi cang mi an um ko nain an ingthawngsu cazin in an chuahter rih hna lo. Cun, ramdang ah a kal cang mi hna zong ingthawngsu ah an telh hna. Mee thlak ding aa tlak mi an telh hna lo i, aa tlak lomi an telh hna ca ah atu bantuk in remhtu an tam hi a si,” tiah Pu Uk Nawl nih The Hakha Post ah a chim.
2020 kum Myanmar ram thimnak ca ah mee cazin hi 2020 July 25 in 2020 August 14 tiang anmah he aa pehtlainak sang le khua, peng pawl ah an tar.
Chin Ramkulh Thimnak Zung nih a voi khatnak mee cazin an tar i an langhter mi ah Chin Ramkulh chung in mee thla kho minung 342,142 an si i, mee cazin a zoh mi minung an dihlak 110,459, zatuak in 32.4 lawng a si tiah kan theih.
Cun, mee cazin an remh than ding kong he pehtai in, Thimnak Zung ah chimphuannak nawlngeitu Pu Lin Kyaw nih, “Remhthan ding in an rak sok mi pawl hi atu hi zohfelnak kan tuah cuahmah. Dodaltu hna zong nih dodalnak an tuah mi hi a tlak ko ahcun kan remh than dih lai,” tiah The Hakha Post ah a chimchap.
Mee cazin remh a hau tiah an ti mi hna remh khawh nakding ah mee cazin zohfelnak tuahtu phu le sang le khuakip i ukchukzihmu hna i bawm in an tuah lai i, a voi hnihnak mee cazin hi September thla dihlei ah an langhter lai tiah thawng kan theih.
