2020 kum Myanmar ram thimnak, Chin Ramkulh meehmun ah aa zuam ding Hluttaw Palai minung 211 an si cang tiah Chin Ramkulh Thimnak Zung Lutlai Pu Uk Nawl sin in kan theih.
“Min a rak i pe mi hi a hramthok ahcun minung 212 an si. A hnu deuh ah minung pakhat min aa pek hnu ah aa let than mi a um. Min pek zong hi a nicaan a dih cang ca ah a ngah ti lo. Min aa pecia mi hna zong August 7 ah khan zohfelnak zong kan tuah cang hna,” tiah Pu Uk Nawl nih a chim.
Chin Ramkulh chung ah aa zuam ding Hluttaw Palai hna hi Ramkulh Hluttaw meehmun ah minung 99, Amyotha Hluttaw meehmun ah minung 64 le Pyithu Hluttaw meehmun ah minung 46 an si tiah kan theih.
Hi hna chung ah Independent in aa zuam ding Hluttaw Palai minung 17 an um i, cu hna cu Pyithu Hluttaw meehmun ah 4, Amyotha Hluttaw meehmun ah 3 le Ramkulh Hluttaw meehmun ah minung 10 an si.
Chin Ramkulh Peng 9 chung ah meehmun hmun 39 ah a um i, Pyithu Hluttaw meehmun hmun 9, Amyotha meehmun hmun 12, Ramkulh Hluttaw meehmun hmun 18 tiin a um.
Chin Ramkulh chung ah mee a thla kho mi minung dihlak 342,142 an si i, meehmun 1107 an hon lai tiah Pu Uk Nawl nih a chimchap.
Aralai mi November 8 ah tuah ding Myanmar ram thimnak ah Chin Ramkulh chung in ramkheel party 13 an i zuam lai. 2015 kum thimnak lio ah Chin Ramkulh chung in ramkheel party 13 in Hluttaw Palai minung 202 an rak i zuam tiah kan theih.
