Chin Ramkulh chung ah Fimcawnnaklei inn 119 cu 2019-2020 tangka kum ah Pyidaungsu tangka nuai 17868.400 in sakding a si ca ah, a satu ding ah tender an auh cang, tiah Chin Ramkulh Fimcawnnak Zung in 2020 February 27 ah kan theih.
“Chin Ramkulh chung khuate khuasa hna fimnaklei in siseh, chawleh chawhrawlnaklei in siseh, pumpak thanchonaklei ca ah fimcawnnak lei thanchoter dingin Basic sianginn pawl Peng kip sianghngakchia tlawmtam zoh in a tlak ning he inn sakding le remh ding le saya/sayamahte um nakding inn sakding tibantuk kan then. Chin ramkulh chung ahhin sianginn sakding le remh ding a tam tuk rih ca ah atu inn 119 hi kum 3 chung ah sakding kan ti,” tiah Chin Ramkulh Fimcawnnak lutlai Daw Hin Gyi nih The Hakha Post ah a chim.
“Chin Ramkkulh hi Peng 9 a um ca ah, Fimcawnnaklei he pehtlai in Hakha Peng ah rian 13 le nawlpek mi tangka nuai 2595.25, Falam Peng ah rian 16 le nawlpek mi tangka nuai 2563.290, Mindat Peng ah rian 9 le nawlpek mi tangka nuai 1210.710 ,Thantlang Peng ah rian 10 le nawlpek mi tangka nuai 1437.380, Tedim Peng ah rian 11 le nawlpek mi tangka nuai 1108.200, Tonzang Peng ah rian 11 le nawlpek mi tangka nuai 1432.200, Matupi Peng ah rian 12 le nawlpek mi tangka nuai 2303.010, Kanpetlet Peng ah rian 26 le nawlpek mi tangka nuai 2973.240 le Paletwa Peng ah rian 11 le nawlpek mi tangka nuai 1245.120 tiin then an si,” tiah Daw Hin Gyi nih a chimchap.
Rian dihlak 119 a si i, Pyidaungsu nawlpek mi tangka dihlak nuai 17868.400 in sakremh an timh. Tender zong an auh cang i, rian 113 cu an hmuh cang. A tang mi rian 6 cu a voi hnihnak ah tender an auh than te lai, tiah Chin Ramkulh Fimcawnnak Zung in kan theih.
Photo/ IPRD Hakha
