Vawleicung ramkip ah a phan mi Coronavirus Disease-2019 (COVID-19) zawtnak a ngei lai tiah lunghrinh mi Hakha khuasa Yangon le Mandalay in a rak tlung mi tlangval pahnih Hakha sii-inn ah an chiah hna i Tedim sii-inn ah USA in a rak tlung mi kum 60 upa nu pakhat zong an chiah ve tiah kan theih.
Hakha sii-inn ah chiah mi lunghrinh mizaw pahnih kong he pehtlai in “Lunghrinh mi mizaw an pahnih ning in Yangon le Mandalay in a rak tlung mi an si. An pahnih in 2020 March 27 zaan suimilaam 7:00 tluk ah sii-inn ah an rak ra. Sii-inn lei rian ngeitu hna nih suimilaam 11:30 tluk ah zohfelnak an tuah hna i an tak a sa, an khuh, an cumpi ca ah atu bantuk in lunghrinh mizaw chiahnak ah kan chiah mi hna a si. COVID-19 zawtnak hrik an ngeih le ngeih lo tu cu Ramkomh Ngandamnak Zung nih check nak an tuah lai tiah,” Dr. Mang Biak Kung nih The Hakha Post ah a chim.
Hakha sii-inn i lunghrinh mizaw pahnih chung in pakhat hi Dagon University ah sianginn a kai lio mi, Hakha Dawrthar sang khuasa a si. Cun, pakhat deuh zong hi Hakha Dawrthar sang khuasa a si ve i, Mandalay, Kyouk-shi ah Engineering a cawng lio mi a si tiah kan theih.
Cun, Tedim sii-inn ah lunghrinh mizaw in an zohkhenh mi hi USA in a rak tlung mi kum 60 upa nu a si. A tak a sa, akhuh, a cumpi ca ah lunghrinh mizaw chiahnak ah an chiah ve.
Hakha khuachung ah Home Quarantine an chiah mi hna hi minung 26 an si cang. Cun, Chin Ramkulh chung ramri gate in zohfelnak an tuah mi hi minung 5,599 an si. Zawtnak hrik a ngei lai tiah lunghrinh mi minung pathum an si cang i minung pakhat zawtnak hrik a ngei tiah Ramkomh Ngandamnak Zung nih a thanh.
Vawleicung ram dihlak huap in hi zawtnak ruang ah a thi mi minung 27,365, zawtnak hrik ngei minung 597,335 le zawtnak in a dam than mi minung 131,712 an si cang tiah 2020 March 28 suimilaam 2:00 pm ah WHO nih a langhter.
