Chin Ramkulh chung ah COVID-19 zawtnak khamhnak sii COVISHIELD cu 2021 January 27 in Ngandamnak Zung riantuan dihlak a voi khatnak cem an chunh hna lai tiah Chin Ramkulh Cozah lei chimphuannak nawlngeitu Sipin Minister Pu Soe Htet sin in thawng kan theih.
Hi sii chunh ding kong he pehtlai in Chin Ramkulh chung hmunkip ah rian ngei hna nih min cazin laak an thok cuahmah. COVID-19 khamhnak sii hi Ngandamnak Zung riantuan le Cozah riantuan le Hluttaw Palai hna hi papek an si lai tiah theih a si.
Hi kong he pehtlai in Minister Pu Soe Htet nih, “Ngandamnak Zung riantuan dihlak papek an si lai. An nih hi 2021 January 27 ah chunh an si lai. Cun, January 28 ah Ramkulh Cozah riantuan Ministers dihlak le lutlai dihlak chunh a si ve lai. Khuate lei motor a phak khawh lonak hmun i Ngandamnak Zung rian a tuan mi hna hi cu a si khawh chung in kan tawlrelpiak hna lai i khuapi chung ah an ralai,” tiah The Hakha Post ah a chim.
COVID-19 khamhnak sii COVISHIELD hi India ram nih an serchuah mi a si i, Ramkomh Cozah tawlrelnak in Myanmar ram chung ah siidur sing 15 a phan cang. Myanmar ram chung a phan cang mi siidur sing 15 nih hin rammi minung sing sarih le cheu a zat hna lai tiah theih a si.
Myanmar ram chung ah Ngandamnak Zung riantuan dihlak minung 110,000 an um i hi chung ah Chin Ramkulh in Ngandamnak Zung riantuan minung 3000 in 4000 kar an si tiah theih a si.
Chin Ramkulh chung COVID-19 khamhnak sii chunh ding kong he pehtlai in Ngandamnak Zung Lutlai Dr. Aung Ngwe San nih, “2021 January 27 hi Ngandamnak Zung i rian a tuan mi pawl chunh hmasa an si lai. Khuate lei motor a phak khawh lonak hmun i Ngandamnak Zung riantuan pawl ca ah a si khawh chung khuapi ah ratter in chunh an si lai. Chin Ramkulh ca ah dur zeizatdah a phak lai ti zong kan hngal rih lo. Cun, minung pazeizat dah chunh an si lai ti hi cu Penguk Zung lei nih ri an khiah lai. Nihin tiang cu zeihmanh thawng an kan thanh rih lo,” tiah The Hakha Post ah a chim.
COVID-19 khamhnak sii COVISHIELD hi minung pakhat ah dur hnih chunh an si lai. Cun, hi sii hi dur hnih chunh ding a si ca ah ni 28 in chunh a si lai. Cun, kum 18 tang le naupawi hna cu chunh an si lai lo tiah kan theih.
