Chin Ramkulh chung i sianghleiruun sianginn kai khawh nakding ca ah phit mi taang 10 camipuai cu, Ramkulh huap zatuak in 21.20 a si i, khuate deuh sianginn pawl ah a awngmi an tam ca ah 2019 kum nakin 2020 kum ah a awngmi zatuak a tam deuh tiah kan theih.
Hi kong he pehtlai in Chin Ramkulh Fimcawnnak Zung Lutlai Pu Bi Ko Do nih, “2019 kum nakin cun tlawmpal te tukum hi a tam deuh. 2019 kum lio kha zatuak in 19.54 a si i, tukum hi zatuak 1.6 a tam deuh. Tukum a awng mi chung ah a tam deuh hi khuate lei i siangngakchia deuh an si. Khuate lei hi kumdang nakin a awngmi an tam deuh. Cun, thiamhlei a ngah mi (D) zong hi kum dang nakin an tam deuh,” tiah The Hakha Post ah a chim.
Chin Ramkulh chung in Distinction a ngah mi hna hi 5D in minung 2, 4D in minung 6, 3D in minung 19, 2D in minung 89, 1D in 403 an si tiah kan theih.
Hakha Pengkomh chung in taang 10 a phi mi an dihlak minung 2549 an si i, a awng mi minung 498, Falam Pengkomh in minung 3768 an phi i, minung 958 an awng, Mindat Pengkomh in a phi mi minung 6053, a awng mi minung 1167 an si tiah kan theih.
5D a ngah mi hi Tedim Peng in minung 2, 4D ngah mi Hakha Peng in minung 3 le Tedim Peng in minung 2, Kanpetlet in minung 1 an si hna.
“Kum dang nakin tukum hi a awng mi an thahnem ngai. Hakha siangsangruun sianginn No.1 hi a liam cia kum 2019 ahkhan zatuak 17.02 lawng a si i, tukum hi 23.4% kan phan kho. Kan sianginn hi 2009 hnu in tukum hi zatuak 20 cung kan kai hi a voi khatnak a si. Chin Ramkulh chung sianginn dihlak a awngmi tam cem top 10 chung ah kan nih Hakha siangsangruun sianginn No.1 hi dot 4,5,6,7,9 ah kan dir,” tiah Hakha Siangsangruun No.1 sianginn uk Pu Biak Cung nih The Hakha Post ah a chim.
Chin Ramkulh chung huap in Mindat Peng hi 30.49%, a phi mi dihlak minung 1535, a awng mi minung 468 in taang 10 awng tamcem ah an dir. Paletwa Peng in taang 10 phi mi minung 2214 an um i a awngmi zatuak in 10.12 lawng a si ca ah Chin Ramkulh chung ah taang 10 a tlawm cem an si. Chin Ramkulh chung ah taang 10 camipuai a phi mi minung 12370, a awng mi minung 2623 an si. Zatuak in 21.20 a si tiah kan theih.
