Chin Ramkulh Chief Minister Salai Lian Luai le Hluttaw Speaker Pu Zo Bawi hna telh in Ministers dihlak 2021 March 3 ah an i thial dih cang tiah Hluttaw Speaker Pu Zo Bawi sin in thawng kan theih.
“March 2 zaanlei suimilaam panga tluk ahkhan Council zung lei nih inn i thial ding in an kan chimh. Ministers le Cozah Lutlai kan dihlak kan i tel. Kanmah le kan inn cio ah kan tin cang lai. Hika kan um chung zong leeng chuah a ngah lo, erhkhumh peng kan si tik ah atu cu zalong tein kan um kho cang lai. Cun, kan nih hi zeihmanh chimnak nawl zong kan ngei ti lo. Hi vial lawng hi kan chimh khawh hna,” tiah Pu Zo Bawi nih The Hakha Post ah a chim.
Ralkap nih uknak a laak hlan NLD Cozah chan ah Cozah chimphuannak nawlngeitu le Sipin minister Pu Soe Htet cu March 3 suimilaam 12:00PM tluk ah a chuak i, Nay Pyi Taw a umnak lei ah a kir lai tiah kan theih.
Chin Ramkulh Chief Minister Salai Lian le Hluttaw Speaker Pu Zo Bawi hna telh in Ministers dihlak February 1 ralkap nih uknak a laak hnu an tlaih dih hna i, inn ah an rak hren hna.
