Chin ramkulh Chief Minister Pu Salai Lian Luai, Chin ramkulh Hluattaw Speaker Pu Zo Bawi, Planning and Finance lei Minister Pu Vui Kaw, Chin ramkulh lamsul lei Minister Pu Sui Thio le Minister Pu Phwe Arr hna cu Matupi peng chung i khuate thanchonak ding rian an tuan mi zohfelnak an va ngei tiah kan theih.
“CM Pu Salai Lian Luai le a tuanti hawi hna cu an phak le cangka in Lee Myo hlei an donh cuahmah mi zei tiangdah an lim timi zohfelnak an ngei. Hi zohfelnak an va ngeih lio ah hlei an donhnak i rian ngei upa U Tin Mg Htwe nih chimfiannak a tuah. Cun, Matupi pengkomh penguk zung (Ukchukzi) inn an sak mi zohfelnak a ngei i U Go Khanh nih chimfiannak a tuahpiak hna. Cun, Matupi peng ah suimilaam 24 chung Electric mei an ngah khawh nakding ca ah an tuah cuahmah mi 66 KV zohfelnak an ngei,” tiah Matupi khua mi Cozah riantuan pakhat nih The Hakha Post ah a chim.
Lee Myo hlei pi hi Mindat le Matupi karlak kalnak motor lampi ah a um mi a si i, a sau lei pe 240, a kau lei pe 30 a si. Hi donhhlei pi hi a liamcia kum 2018 October 18 in donh hram an rak thok i zatuak 95% an lim cang.
