Chin Ramkulh ca ah facang tun 2,000 ralrin ah kan cawk cia, tiah Chin Ramkulh Cozah chimphuannak nawlngeitu Sipin Minister Pu Soe Htet nih a chim.
“Chin Ramkulh chung lamsul lei cu khoika hmanh kan phit rih lo. Cucaah, facang le thilri dangdang zong caan hman tein a phan ko lai. Cun, ruahlopi in lam phih hna a herh sual le eidin lei ah harnak kan tong sual lai tiah ralrin ah facang tun 2,000 Chin Ramkulh Cozah nih kan cawk. Hihi kan phawtzamh lai, Chaklei Chinram ah tun 1,000, tlanglei Chinram ca Mindat ah tun 1,000 kan kuat lai. Cun, chaklei Chinram ca ah Hakha ah tun 500 le Tedim ah tun 500 tibantuk kan phawtzamh lai. Facang a dih lo nakding le a man a kai lo nakding ah Myanmar Facang Phu le Pyidaungsu zong ceihhmainak an ngei lai. Thil dangdang zong Pyidaungsu nih ceihhmainak a ngei lai i, a tlamtling ko lai,” tiah Sipin Minister Pu Soe Htet nih The Hakha Post ah a chim.
Cun, khua chung motor luh ning kong le khua chung thutdirnak kongkau he pehtlai in, zing tuan tuk le zaan tlai tuk ah motor luh lo ding. Khua chung ah fimchimnak ca tar ding le kut tawlnak chiah ding in an timh.
“Khua chung luhnak lam hi kan phit lo nain, zaan tlai hnu le zing tuan tuk ah motor a lut mi an um ca ah, zing suimilaam 8:00 hlan le zaan tlai ahcun luh lo ah a tha. Khua luhnak hauka in Ngandamnak Zung lei nih an check khawh caan ah luh a si lai. Cun, Hakha zong ah WHO nih a chuah mi ralrinnak ca zong Vinyl nganpi pathum in kan tuah lai i, khua chung ah kan tar lai. Catlap fa tete zong in ralrinnak ca tete tial in phawtzamhnak zong kan tuah lai. Kuttawlnak zong mizapi an i chawhlehnak hmun, Pengkomh Zung, Market le Hakhathar tibantuk ah pung nganpi in kan chiah lai,” tiah Minister Pu Soe Htet nih The Hakha Post ah a chimchap.
Atu tiang ah Chin Ramkulh luhchuahnak lam zong phih a si rih lo i, facang, chiti le thilri dangdang zong caan hman tein a phan ko, tiah kan theih.
