Chin ramkulh Falam Surbung vanlawngbual cu an lim cang caah Hakha in Falam lei tlamtling tein khualtlawn umkal khawh nakding caah Hakha-Falam kar motor lampi an kauh cuahmah lio a si, tiah kan theih.
Hi kong he pehtlai in Minister Pu Sui Thio nih, “Lamkauh cu a tha tuk mi a si. Tuan tein rak kauh ding kan i tim, a si ko nain World Bank nih kan tuan lai an ti caah, kan kauh lo. Surbung vanlawngbual zong an hon dengmang cang caah, Hakha lei in kal a hau lai, Falam lei in rat a hau ve cang lai caah lam kha a that taktak a hau cang. Cucaah lam kha kan kauhnak a si ko. Chin ramkulh budget in tuan mi a si. Hi lam kan kauh mi hi a herhnak deuh tete kha tuah a si, tukum chungah tuah manh mi vial tuah hmasa ding a si. Cun World Bank zong nih hin hmai kum 2021 tlai deuh in cun lamkauh kha an thok colh ve cang lai. Lam aa kuaih tuk nak pawl kha chimh le remh an hau. World Bank hi Kalay in Hakha tiang lamkauh ding an si nain lam a thatnak pawl cu an hrial pah te ko lai i lam a rawhnak bik pawl tu kha tha deuh in cawh ding si ko lai.” tiah The Hakha Post ah a chim.
Hakha in Falam lampi motor lam hi Surbung vanlawngbual hon a si cang lai caah, motor in siseh, motorcycle in siseh khualtlawn, tlamtling tein umkal khawh nakding caah an kauh cuahmah lio mi a si, tiah kan theih.
