Paletwa Peng le Falam Peng chung in NLD party teinak a hmu mi Pyithu Hluttaw palai minung pahnih hna cu USDP in Hluttaw Palai pakhat le ralkap nih duhlonak ca Union Election Commission Zung ah an chiah tiah Chin Ramkulh NLD Thimnak ah teinak hmu ding in rian a tuan mi Committee sin in thawng kan theih.
“Kanmah leikap nih cun, upadi ning tein duhlonak an langhter mi le ca an chiah mi hi kan lehrulh hna lai. Keimah leikap nih ka ruah ning ahcun, atu bantuk an tuah hi thimnak ah tlukruannak a um lo tiin i lungsinak ngei loin an tuah mi a si ko lai ti hi zumhnak ka ngei. Duhlonak ca an chiah cang ca ah kanmah lei nih cun upadi ning tein kan lehrulh ve ko hna lai,” tiah Chin Ramkulh NLD Campaigner Salai Isaac Khen nih The Hakha Post ah a chim.
Paletwa Peng, Pyithu Hluttaw mee hmun ah aa cuh i teinak a hmu mi Hluttaw Palai Pu Sing Aung hi USDP party le Hluttaw Palai nih duhlonak ca an chiah mi a si. Cun, Falam Peng Pyithu Hluttaw mee hmun ah aa cuh i teinak a hmu ve mi Hluttaw Palai Dr. Riang Vel hi cu ralkap mee a pe mi hna nih duh lonak ca an chiah ve mi a si tiah kan theih.
Pu Sing Aung duh lonak ca a chia a tu hnawhtu USDP party in Hluttaw Palai aa cuh ve mi Salai Khoi Yang nih, “Duhlonak ca chiah ding hi ka rak i timh mi a si lo. Asinain, caan a vun rauh deuh tik ah amah tein a diklonak tete a lang thluahmah. Atu bantuk in duhlonak ca ka chiah mi zong hi amah ka doh ruang ah si loin, hmailei caan ca tiang ka ruah ca ah a si. Pu Sing Aung nih ningcang loin a cawlcangh ca ah keimah hi teinak ka co lonak a si. Tangka in siseh, eidin le thilri a dangdang tam piin mee pek sawmnak a tuah. Atu duhlonak ca ka chiah mi ahhin phun 9 in ka tial i ka chiah,” tiah The Hakha Post ah a chim.
NLD lei in Pu Sing Aung le USDP lei in Salai Khoi Yang hi Paletwa Peng Pyithu Hluttaw mee hmun ah aa zuamcawh mi an si i, Pu Sing Aung nih mee 203 in a tei mi a si. Dr. Riang Vel zong hi Falam hrambunh Khah-la-ya 268 ralkap sakhan chung in ralkap pakhat nih duhlonak ca a chiah ve mi a si.
Dr. Riang Vel nih, “Keimah leikap nih cun mee pek sawmnak kan kal lio ahhin zei palhnak le sualnak hmanh ka tuah lo, ka ngei lo tiah kaa ruat ko,” tiah The Hakha Post ah a chim.
Falam Peng Pyithu Hluttaw mee hmun ah aa zuam mi hi NLD in Dr. Riang Vel, CNLD party in Pu Hrang Kian Lo, USDP party in Pu Ram Kip Ceu le Independent in Pu Kawl Lian Thang hna an i zuam. Hi aa zuam mi chung ah Dr. Riang Vel nih CNLD party in aa zuam mi Pu Hrang Kian Lo cu mee 9357 in a tei tiah kan theih.
Dr. Riang Vel duh lonak ca a chia tu sin ah The Hakha Post nih pehtlaihnak kan tuah ko nain kan pehtlai kho lo. Falam Peng chung lawng ahhin ralkap nih a thanh ning ah mee ningcang lo a si kho mi mee 3843 a um tiah an thanh.
