Chin Ramkulh ah La-Wa-Ka le Milu Thazaang Minister Zung thar (Ministry of Immigration and Population) chap ding President nih cakuat, Hluttaw nih fehter ding lawng a taang, tiah June 25 ah kan theih.
“Myanmar ram President U Win Myint nih Ramthen le Ramkulh dihlak ah La-Wa-Ka le Milu Thazaang Minister Zung thar chap nan duh ahcun Hluttaw Palai lungtlinnak la hmasa ulaw chap nan si lai, tiah ca a kan kuat. Cucu, June 27 ah tuah ding mi Hluttaw caanhmaan meeting ah kan ceih lai. Kan lungtlin dih ko ahcun Minister Zung thar cu chap a si lai,” tiah Chin Ramkulh Hluttaw Speaker Pu Zo Bawi nih The Hakha Post ah a chim.
June 25 in 26 tiang Chin Ramkulh Hluttaw Yeyar meeting an tuah i June 27 ah caanhmaan meeting an tuah lai. Cu tik ah Hluttaw Palai dihlak nih an lungtlin ahcun La-Wa-Ka le Milu Thazaang Minister Zung thar chap a si lai, tiah kan theih.###
