Chin Ramkulh chung i a hmasa bik tualchun g tour guide training cu Hakha khuapi ah an tuah i minung 80 leng an kai tiah kan theih.
Hi kong he pehtlai in Chin ramkulh Tourist zung lutlai Ko Aung Phyo nih, “Training hi 2020 February 25 ahkhan honnak (Open Ceremony) kan tuah. Laitlang chung ah Tour Guide hi an um rih lo ca ah kan harsa ngai. Kanpelet le Mindat ah Tour Guide minung 20 hrawng kan herh te lai tiah ka ruah. Cun, Chaklei laitlang ah tour guide minung 30 hrawng cu kan herh te lai ti chim khawh a si. Cun, tualchung tour guide an tuan i license an ngah kum 3 a rauh hnu ah camibuai an phi lai i, an awn a si cun rampi level in tour guide tiang an tuan kho lai,” tiah The Hakha Post ah a chim.
Hi tour guide training ahhin Thantlang peng in minung 3, Hakha peng in minung 10, Falam peng in minung 30, Tedim peng in minung 6, Kalay in minung 2, Mindat peng in minung 27, Kanpelet peng in minung 1, Matupi peng in minung 2 le Paletwa peng in minung 2 an kai.
Cun, “Atu kan training hi March 20 tiang a si lai i, hi training a hramthok in a dongh tiang a kai mi poh cu certificate kan pek hna lai. Certificate a ngah mi poh nih Tour License an ngah khawh nak ding ca ah ca le oral an phi than lai i, a awng mi poh cu Tour Guide an tuan kho lai” tiah a chimchap.
Photo/ IPRD Chin
