Myanmar ram luatnak a hmuh hlan ah Chinmi chung in Mirang ralkap (British) a rak tuan bal mi chung in nihin tiang a nung rih mi bawmhnak pek an pehzulh.
Hi bawmhnak pek mi cu Chin Human Right Organization (CHRO) nih tuanvo laak in a tawlrel i pehtlaihnak a tuah, tiah kan theih.
“Bawmhnak a petu hi UK ah a um mi H4FA an si i hlan lio ralkap a rak tuan mi a bawmtu pawl khi an si. Chinmi chung in Mirang ralkap a rak tuan bal mi a nung rih mi cu anmah kha bawmhnak an pek hna. Anmah an nun ti lo ahcun an nupi le bawmhnak an pek hna. An pahnih in an thih ahcun bawmhnak an pe ti hna lo,” tiah CHRO Project Director Salai Van Biak Thang nih The Hakha Post ah a chim.
Bawmhnak pek mi hi 2017 kum in thawk a rak si i 2017 kum ah minung pakhat tangka Kyats sing khat, 2018 kum ah minung pakhat tangka Kyats 304,000 bawmh an si i 2019 kum ca ah bawmhnak pek ding tangka zat a fiang rih lo.
“Tu hi 2019 kum bawmhnak pek ding mi kan tawlrel lio a si. A cheu cu an nung maw, an dam maw ti zong hngalh lo mi kan pehtlaih khawh lo mi an um ca ah nihin hi Tedim le Tonzang lei ah riantuantu an kal. A cheu cu nikum ah kan pehtlaih khawh ko nain tu kum kan pehtlaih khawh ti lo mi an um ve than ca ah Thantlang Peng tlawn zong kan i tim,” tiah Salai Van Biak Thang nih a chimchap.
Bawmnak an pek mi chung in dam lo ruang ah hmuh dang kal le sii-inn umnak ah dihheu mi vialte zong bawmhnak pek an si, tiah kan theih.
