Kalaymyo lei in Chin ram ah a rak kai cuahmah mi SAC ralhraang pawl cu Civic Defense Militia – CDM-Siyin le Mountain Eagle Defence Force (MEDF) i bawm in March 10, zinglei 8:30 ah bomb an puah hna ca ah SAC ralkap paruk hmunril in an thi i 21 hma faak an pu tiah CDF CDM Siyin nih an thanh.
Cuka hmun ahcun CDF-KKG Battalion-7 zong nih a rak kan bawmh ve ti zong cathanh ah an telhchih.
Cu lawng siloin March 11 zinglei 8:30 in zaanlei 4:00 tiang voi 10 bomb in kan puah hna i SAC lei in a thi mi le hma pu an tam, rammi ralkap lei in hma pu kan um lo ti zong an langhter.
Cun, Kalay – Tedim lampi hman khawh a si cang i nawlzulhnak in a kan bawm mi khualtlawng pawl nan cung ah kan i lawm ti zong an tialchap.
