Chin ramkulh, Rezua khuapi SAC ralhraang camp cu Chin ralkap phu komh nih nihin November 29, zinglei suimilaam 10:00 hrawng ah an laak i, khuapi ning in an laak khawh cang tiah theih a si.
“Rezua khua laaknak operation cu ZZLMS Operation tiah min kan bunh. November 29, zinglei suimilaam 10:00 hrawng ah Rezua khua pumpi ning in kan laak khawh cang,” tiah CDF-Zotung in tuanvo ngeitu pakhat nih Hakha Post ah a chim.
ZZLMS Operation cu November 26 in an thawk i Rezua khua laak kahdohnak ah Chin ralkap phu komh nih SAC hriamnam kuanzen tampi an laak khawh tiah kan theih.
“CDM tuah ding le hriamnam chiah ding in kan chimh lengmang hna nain an duh lo. Voi tampi kan leem hna i an duh lo caah an camp kan luh hnawh i kan laak. thawng tling deuh in kan thanh than te lai” ti zong CDF-Zotung in tuanvo ngeitu nih The Hakha Post ah a chim.
Rezua khua laak kahdohnak ah CDF-Zotung ralkap pakhat le CDF-Mara ralkap pakhat nih ram le miphun ca ah an nunnak an pek tiah kan theih. SAC nih Rezua khua chung ah vanlawng in bomb voi tampi a thlak. SAC lei in a thi mi le hma pu zat tu cu phung ning in tuanvo ngeitu nih an thanh rih lo caah fehter khawh a si rih lo.
Rezua khuapi laak kahdohnak cu CNA, CDF-Zotung, CDF-Lautu, CDF-Mara, CDF-Zophei, CDF-Senthang, CDF-Matupi B-2 i bawm in an tuah mi a si tiah kan theih.
