Nizan January 3 ah khan Mizoram Chief Minister Lalduhoma le India rampi External Affiars Minister Dr. S. Jaishankar cu hmunkhat ah biaruahnak an ngei i, atulio Myanmar ralzam kong he pehtlai in ceihmainak zong an ngei, tiah thawng kan theih.
“Myanmar ram in Mizoram ah a rak lutmi ralzam hna kong le atulio Myanmar ram kong zong i ceihmainak kan ngei,” tiah CM Lalduhoma nih a Facebook cahmai ah a ṭial.
“Atu kan hmanmi India-Myanmar ramri hi British cozah nih an rak tuahmi a si i, unau (Chin-Mizo) zong a kan ṭhenter. Cucaah, kannih Zofate nih cun hihi a cohlan zia kan i harh ngai. Phun khat kan si bantuk in lairelnak pakhat tang ah um khawh ding hi kan duh bikmi a si,” tiah CM Lalduhoma nih Dr. S. Jaishankar sin ah a chim.
India cozah nih ramri hauhruang a ser a si ahcun hlanlio British cozah nih a rak kan ṭhennak ramri hi a cohlan a si ve lai. Cucu a ṭha lo kan ti pin ah kannih nih cun kan pom kho lo, tiah a chim chih.
December 2023 chung ah khan Mizoram CM Lalduhoma nih Dr. S. Jaishankar hi Myanmar ralzam kong he pehtlai in biaruahnak a rak ngeih bal cang, tiah thawng kan theih.
