Chin State Administration Council nih a voi 73nak Chin Miphun Ni tuah nakding ca ah tiin, Chin Ramkulh Pengkua ning in Kyats sing 10 cio a pek hna lai i, mah le pengtlang cio ah tuah a si lai tiah nihin February 17 Council meeting ah biachahnak an tuah.
2021 kum a voi 73nak Chin Miphun Ni hi COVID-19 zawtnak rai a chuah lio a si ca ah, minung tampi tuah loin le mah le pengtlang cio ah minung 60 cung luan loin tuah ding tiah Council lei rian ngei hna sin in thawng kan theih.
Chin Miphun Ni tuah ding kong he pehtlai in SAC Chairman Pu Ngun San Aung nih, “Chin Miphun Ni hi tuah lo awk a that lo ca ah tuah hrimhrim a hau. Hi tuah nakding ca ah ka tuan hawi midang zong ka chimh hna. Cun, tuchun kha meeting kan thu i tuah ding kan lung a tling. Tuah ding a si ko nain, minung rikhiah in kan tuah lai. Mah le pengtlang cio ah tuah a si lai. Pengtlang cio tuah nakding ca ah Council lei nih pengkhat ah sing 10 pek an si lai. Cun, minung 60 cung luan loin tuah a si lai,” tiah The Hakha Post ah a chim.
Kum 73nak Chin Miphun Ni hi NLD Cozah zong nih COVID-19 zawtnak ruang ah kum dang bantuk in tuah a si lai lo tiah a rak thanh bal cang. Cun, tuah a si hmanh ah Falam Surbung Airport honnak tuah pah in tuah a si lai tiah an rak thanh.
Cun, Hakha i Chin Miphun Ni an tuah nakding kong he pehtlai in, “Hakha ahcun Town Hall ah kan tuah lai i, Tha-ba-pa-tih biachimnak a um lai. Cun, lunglawmhpinak cakuat hi keimah nih ka rel lai. COVID-19 lio a si ca ah social distancing in thut a si lai. Pengtlang dang zong hi kanmah bantuk in tuahter dih an si,” tiah Pu Ngun San Aung nih a chimchap.
Kum 73nak Chin Miphun Ni hi Hakha ah CACC caholh le nunphung committee lei nih tuah an timh ve. Council nih tuah ding mi le CACC tuah ding mi hi hmun khat lawlaw ah tuah ti ding in Council lei Lutlai Pu Ngun San Aung nih a ca a pek hna nain an let rih lo tiah theih a si.
