Hakha khua ah Chin Ramkulh Cozah nih tuah ding mi a voi 70nak Chin Miphun Ni a naih thluahmah cang ca ah Hakha khuachung tamhmawih hram an thawk thluahmah cang.
“Kum dang nakin tu kum hi i phundang deuh seh, khuami zong kan lung i hliphlau deuh seh, cun, a ngaih zong i ngai deuh sih ti kan duh. Cucaah, biatak tein khua chung hi tammawih kan timhnak a si. Atu hi an thawk cuahmah cang i Famlam lamthen le Thantlang lamthen lei khin aa thawk thluahmah lai. Hotel kip le lamkam um inn ngei hna bawmh hal an si i anmah he i bawmh in kan tamhmawih lai,” tiah Chin Ramkulh Sipin Lutlai Pu Thla Hre nih The Hakha Post ah a chim.
Hihi Hakha lawng si lo in a dangdang khua, Matupi le Mindat lei zong thawngthanh dih an si cang i an khuachung an rak tammawih cio lai, tiah theih a si. The Hakha Post
