2020 Myanmar ram party tling democracy thimnak ah Falam Peng, Ramkulh Hluttaw No.1 Independent in aa zuam ding Pu Con Kheng nih, Sagaing ramri catar cu Chinram pee 1,200 chung ah an taar caah a hrawhter hna i zohfelnak tuah than ding in cathanh a chuah tiah thawng kan theih.
Hi kong he pehtlai in Pu Con Kheng nih, “Sagaing lei nih kan ram tam ngai an kan nawr cang. Atu hi kanmah kan ram chung pee 1,200 bak ah Sagaing Ramthen in kan in don hna timi ca an tar. Hi an tarnak hmun hi kanmah ram a si ko ca ah ka duh lo i, 2020 October 7 ah ka phawiter than hna. An phawi dih hnu ah kanmah lei nih ca kan taar rih lo,” tiah The Hakha Post ah a chim.
Chin Ramkulh chung pe 1,200 ah ca an taarnak hi kanmah Chinram a si i, hi an tarnak chung ah Falam Peng Pamuanchaung khua aa tel. Pu Con Kheng hruainak in ca an taar mi cu hrawh a si nain Sagaing Ramthen chung rian ngei hna nih anmah ca an taar than thiamthiam tiah kan theih. Atu ca an taar mi hi 2016 kum lio tein an rak taar cang mi a si.
Anmah ca an taar than mi kong he pehtlai in, “Ca an taar mi cu khuami hna ka vun chawnh hna i an hrawh dih cang. 2020 October 25 ahkhan ka va kal than i, Sagaing Ramthen chung rianngei Laan-bu pawl nih Sagaing Ramthen chung in kan in don hna timi ca a thar an rak taar than. Anmah ram a si lomi chung ah an rak kan cuh ca ah dai tein ka um lai lo. Ca zong ka tial than rih lai. Atu ram an rak kan nawrnak, chuh an kan timh mi hi Chin Ramkulh Cozah zong nih theih loin a um lai lo, a theih ko nain zeihmanh a tuah duh lomi zong hi ruah awk a phu ngai,” tiah The Hakha Post ah a chimchap.
Pu Con Kheng hi 2010-2015 USDP Cozah chan ah Amyotha Hluttaw MP a rak tuan bal mi a si i, tutan thimnak ah CNLD party in zuam aa tim nain, EC thimfung ah a tlin lo ca ah atu bantuk in Ramkulh Hluttaw No.1 ah Independent in aa zuamnak hi a si tiah kan theih.
