Chinram, Paletwa peng chung ah a cang mi Mara hriamtlai karlak kahdohnak ah AA nih kan i teltumnak a um lo, tiah March 4 ah tuah mi Presss Conference ah AA chimnak nawlngei U Khaing Thu Kha nih a chim.
Mara hmunram ah a cang mi kahdohnak ah AA an i tel tiah an chim mi hi biavaivuan men a si i, ramkhel lei in minchiatter a kan duh caah a si, tiah a chim chap.
“Atu bantuk in SAC ralkap kan doh cuahmah lio caan ah dohthlengtu ralkap karlak le miphun pakhat le pakhat karlak buaibainak chuahpi hi AA nih thazaang kan pe hrim lo,” tiah U Khaing Thu Kha nih a langhter.
March 4 ah AA nih a voi 8nak Press Conference a tuah i, atulio Myanmar ram dohthlennak ah AA hraimtlai an cawlcanghnak pawl chimfiannak le Media lei biahal mi pawl lehnak an ngei.
