2016-2020 kum kar Chin Ramkulh Hluttaw ah biatung voi khat hmanh a dirh lomi minung paruk an um i, hi chung ah Chief Minister, Hluttaw Speaker le Minister dang minung pathum an i tel tiah Chin Ramkulh Hluttaw nih cazin an laak mi chung in theih a si.
Biatung voi khat hmanh a dirh lomi Hluttaw Palai hna hi NLD in Chief Minister Salai Lian Luai, Minister Pu Sui Thio, Minister Pu Vui kaw, Hluttaw Speaker Pu Zo Bawi, ZCD party in Minister Pu Pau Lun Min Thang le CNLD in Hluttaw Palai Salai Aung Lian hna an si.
Caan hnihnak Hluttaw chung ah biahram voi khat hmanh an dirh lonak kong he pehtlai in Chin Ramkulh Hluttaw Speaker Pu Zo Bawi nih, “A ruang tampi kan theih khawh lomi zong a si kho. Cun, a cheukhat cu a lung ah a um lomi zong kan um ve. Anmah hmun le ram a that nakding ca lawng ah biatak tein a tuan mi le a tuaktan mi zong an um ve,” tiah The Hakha Post ah a chim.
Caan hnihnak Hluttaw kum nga chung ah voi khat hmanh biatung a dirh lomi Hluttaw Palai minung 7 chung ah CNLD in Salai Aung Lian le NLD in Minister Pu Sui Thio lawng 2020 kum Myanmar ram thimnak ah teinak a hmu lomi an si.
Kum nga chung caan hnihnak Chin Ramkulh Hluttaw ah biatung dirh ding in an chuahpi mi dihlak 36 a si i, hi chung ah biatung dirh ding in cohlan mi dihlak 18 a si. Biatung dirh ding cohlan mi 18 chung ah Hluttaw Palai pakhat nih biatung dirh ding a chuahpi mi pakhat cu amah lei nih aa let than tiah theih a si.
Biatung dirh ding chuahpi mi 36 chung ah a tam cem 6 a chuahpi tu hi Falam Peng, Ramkulh Hluttaw No.1 mee hmun in teinak a hmumi Pu Ral Hnin a si i, biatung dirh ding pakhat lawng a chuahpi mi hi Tedim Peng le Paletwa Peng Ramkulh Hluttaw No.1 in aa zuam mi Pu Thang Din Khup le Pu Kan Tin hna an si tiah kan theih.
Caan hnihnak Chin Ramkulh Hluttaw kum nga chung ah thimmi Hluttaw Palai minung 18 le ralkap lei in a kai mi Hluttaw Palai minung 6, dihlak fonh Hluttaw Palai minung 24 an si. Ralkap in a kai mi Hluttaw Palai minung paruk chung ah minung pakhat hmanh nih biatung dirhnak le biahalnak an tuah bal lo tiah theih a si.
