Chin ramkulh cozah nih tolre a cing mi hna ca ah SME tangka cawihnak tukum chung ah a pek lai tiah Chin ramkulh Sipin Minister Pu Soe Htet nih June 18 ah Chin media sin ah a chim.
“Tuan ah SME tangka cawinak hi Chin ramkulh cozah nih a tuah i an sok cio ko nain minung pathum lawng pek an si. A ruang cu bank in a kal mi a si i annih bank cu an i ralrin tuk ca ah a cawi ding mi nih amahkhannak ngeih le tuah ding tampi a um ca ah zapi ca ah a fawi lo. Cucaah atu cu zapi nih amahkhannak ngeih, tuah hau lo le harsa tuk lo in an cawi khawh nakding in kan cawih u, tiah cunglei Pyidaungsu ah kan chim i, a rauh hlan ah cawih khawh ding in kan i zuam,” tiah Minister Pu Soe Htet nih a chim.
“A bik in tolre hi a cing mi an tam i tha kan pek mi a si ca ah tukum ah pek ding in kan timh. Asinain atu hi a tuh caan thla khat a luan cang ca ah a tuh cia mi maw kan cawih hna lai, asilole a tuh ding mi dah kan cawih hna lai, ti kha kan tuaktan lio a si,” tiah Pu Soe Htet nih a chimchap.
Hi SME tangka cawihnak a tawlreltu hi Peng level in siseh, Ramkulh level in siseh a tawlreltu le a zohfeltu committee zong an ser cuahmah lio a si. Zeizat in cawih ding le zeitik ah cham ding ti mi a cawih ningcang tu cu tuanvo ngeitu nih thanh than te ding a si. ###
