Chin Ramkulh Cozah nih Sang thar samh mi le inn thehpiak ding a ti mi kong ah Hakha ramngei hna nih July 31 ah Thantlang le Falam lampiak in Vumthumaung certual tiang duhlonak lam an zawh.
Hi lamzawhnak ah duhlonak biatlang 16 a biapi in an au. An au mi pawl cu; Chin nunphung ning tein lo thlam sak mi kan thet kho lo, Hakha khua 43.90 square miles kauh mi kan duh lo, upadi zulh loin riantuan mi Minister pawl kan thlenpiak u, lothlo le sifak vawlei zuar in ram thanchoter kan duh lo, Chinram ah vawlei a lawng mi a um lo—pupa vawlei lawng a um, vawlei hmannak upadi he aa tlak in zohfelnak a um lo i upadi he aa kalh in nawlngeihnak hman mi ngol cang u, Chin nunphung le nuhrin covo upat ding, Vawlei kong upadi ning tein Myanmar ram ningpi in an zulh nain Chin Ramkulh Cozah nih a zul lo, rammi nih pek mi nawlngeihnak kha mah hlawknak ca ah hmang hlah, rammi duhnak in upadi nih khuhchilh ding, 1894 kum vawlei upadi ning in khuhchilhnak, Upadi ning loin Hakha khua sersiamnak rian kan duh lo, Vawlei chuh mi a ngeitu sin ah rianrang tein pek than ding, Chinmi covo kilven ding, Lothlo hna khuasaknak thanchoter ding le Ziknawh Eihmuarnak Hloh ding, an si.
“Ramngei hna nih Chin Cozah kan ton hna i kan ceihmaipi hna zong ah an duh lo i anmah zong nih an kan ceihmaipi lo. Hihi kan duh lo bik mi a si. Thil cu i ceihmai hnu ah phi hi a um,” tiah lamzawhnak ah tuanvo ngei a si ve mi upa pakhat nih The Hakha Post ah a chim.
Hakha khua sipin area 43.90 square miles kauh mi cu phungluut a si le si lo kong ah rammi nih lunghrinhnak a um. Hakha khua kauh mi hi a dik le dik lo, phungluut tein kauh a si cang maw tibantuk biahalnak an tuah nain bialehnak a um lo, tiah lamzawh mi hna sin in kan theih.##
