Matupi-Mindat lam lei ah rallam a sial mi SAC ralkap nih Chanpian khua inn dihlak dengmang an khangh, tiah Matupi mizapi ukhruaitu bu nih thawng an chuah.
Matupi hrambunh SAC ralkap bu (IB-304) cu February 1 ah khan Chanpian khua lei ah rallam sial in an kal hna i, February 2 ah Chanpian khua inn an khangh hna hi a si.
Cu SAC ralkap pawl cu CDF-Matupi nih lampi ah bomb an puah hnawh hna i, ralkap 6 hrawng hliam an pu, tiah CDF-Matupi nih thawng an chuah ve.
Atu bantuk in Matupi-Mindat lam lei ah SAC ralkap thazaang 200 hrawng nih rallam an sial ruang ah Matupi-Mindat lamcung ah a um mi khuami tampi cu himnak hmun ah an zaam hna i, eidin le sii-ai tibantuk a rianrannak in bawmh an herh, tiah Matupi mizapi ukhruaitu bu nih a langhter.
